मेचीनगर पनि मंगलबार राति १२ वजेदेखि सिल

धुलाबारी, १२ साउन । मेचीनगरमा पनि साउन १३ गते मध्यरातको १२ बजेदेखि १९ गतेसम्म सिल गरिएको छ ।

सोमबार बसेको मेचीनगर स्तरीय कोभिड १९ रोगथाम नियन्त्रण व्यवस्थापन समितिको बैठकले कोरोनाको संक्रमण र मृत्युदर बढ्दै गएपछि नगरक्षेत्रलाई सात दिनका लागि सिल गर्न कार्यपालिकालाई सिफारिस गरेको हो ।

समितिको सिफारिसका आधारमा मंगलबार मध्यान्ह बसेको कार्यपालिका वैठकले साउन १३ गते मध्यरातको १२ बजेदेखि साउन १९ गते मध्यरातको १२ बजेसम्म सिल गर्ने निर्णय गरेको निमित्त मेचीनगर प्रमुख मीना पोखरेल उप्रेतीले बताइन् ।

मेचीनगरले आयोजना गरेको पत्रकार सम्मेलनमा निमित्त प्रमुख उप्रेतीले बन्दाबन्दीको अवधिमा अस्पताल, स्वास्थय चौकी, केन्द्र, एम्बुलेन्स, बारुणयन्त्र, सेवाबाट प्रदान हुने सेवा, औषधि पसल, खोप सेवा, फोहोरमैला संकलन तथा व्यवस्थापन, विद्युत, टेलिफोन, खानेपानी इन्टरनेट सेवा प्रदायक संस्थाका अत्यावश्यक कार्यहरु २४ सै घण्टा खुला रहने, दुध अण्डा, फलफूल तरकारीका पसलमात्र विहान ६ देखि ८ बजे २ घण्टासम्म खुला रहने जानकारी दिए ।

बैठकले बन्दाबन्दीको अनुमोदनका लागि जिल्ला प्रशासन कार्यालय झापालाई अनुरोध गर्ने समेत बैठकले निर्णय गरेको छ । बैठकले अत्यावश्यक काम बाहेक घरबाट बाहिर ननिस्कन, व्यापार, व्यवसाय, उद्योग कलकारखाना, शिक्षण संस्था, नेपाल सरकारले सञ्चालन गर्नका निम्ति तोकेका बाहेकका सबै सवारी साधन पूर्ण रुपमा बन्द गर्ने गराउने, सरकारद्वारा तोकिएको सामाजिक दुरी तथा स्वास्थ्य सुरक्षाको मापदण्ड पालना गर्न, हाट बजार, मेला, जात्रा, महोत्सव पार्टी भोज लगायत भीडभाडमा हुने सवै खाले कार्य गर्न नगराउन समेत सवैमा नगरपालिकाले आग्रह गरेको छ ।

फ्रन्टलाइन कर्मचारीको हकमा परिचय पत्र साथै बोकीमा आवतजावत गर्न, कक्षा ११ को पूर्वानिर्धारीत परीक्षा कार्यक्रम स्वास्थ्य सुरक्षा मापदण्ड तथा सामाजिक दुरी कायम गरी सञ्चालन गर्न, होटल, वैंक तथा सवैखाले वित्तिय संस्थाहरु पूर्णरुपमा बन्द गर्न गराउने, उद्योग, कलकारखाना सञ्चालन सम्बन्धमा आवश्यक जनशक्तिहरुलाई उद्योग परिसर भित्रै स्वास्थ्य सुरक्षा मापदण्ड पालना गरी सञ्चालन गर्ने गराउने समेतको निर्णय कार्यपालिकाको बैठकले गरेको छ ।

पत्रकार सम्मेलनमा मेचीनगर वडा नम्बर ४ का वडाध्यक्ष तथा कोभिड संक्रमण नियन्त्रण कार्यदल संयोजक नवीन वराल, इलाका प्रहरी कार्यालय धुलावारीका प्रहरी निरीक्षक विकास राई, सशस्त्र प्रहरी बल नेपाल वीओपी काँकरभिट्टाका प्रमुख सशस्त्र प्रहरी निरीक्षक प्रेमकुमार राई लगायतको सहभागिता रहेको नगरपालिकाका प्रेस संयोजक लक्ष्मी उप्रेतीले जानकारी दिए ।

यसअघि झापाको दमक, बिर्तामोड, कनकाई, बुद्धशान्ति र शिवसताक्षी नगरपालिकाले आ–आफ्नो क्षेत्र सिल गर्ने निर्णय गरिसकेका छन् ।