काँकरभिट्टा, २० साउन । मेचीनगरमा बुधबार २ हजार ५ सय बढीले कोभिड १९ विरुद्घको खोप लगाएका छन् ।
मेचीनगरको १, २, ५, ६, ९, १२ र १४ नम्बर वडा गरी ७ वटा वडामा बुधबार ५० देखि ५४ बर्ष उमेर समुहका लागि जोन्सन एण्ड जोन्सन कम्पनीको खोप लगाउने व्यवस्था मिलाएको थियो ।
मेचीनगरका ७ वटा वडाबाट लक्षित उमेर समुह र फ्रन्टलाईनमा काम गर्ने गरी कुल २ हजार ७ सय २६ जनाले खोप लिएको मेचीनगर स्तरीय कोभिड १९ नियन्त्रण कार्यदल सचिवालय संयोजक नविन वरालले जानकारी दिए ।उनका अनुसार लक्षित उमेर समुहका २ हजार २ सय ४६ र यातायात व्यवसायी, भन्सार एजेन्टलगायत फ्रन्टलाइनमा रहेर काम गर्ने ४ सय ८० जनाले खोप लिएका थिए । सवैभन्दा बढी मेचीनगरको वडा नम्बर ६ मा ६ सय ४५ जनाले खोप लिएका थिए भने सवैभन्दा कम वडा नम्बर ५ मा २ सय जनाले भ्याक्सिन लिएको सम्बन्धित वडाका स्वास्थ्य प्रमुखहरुले जनाएका छन् ।
स्वास्थ्यकर्मी विक्रम अधिकारीले दिएको जानकारी अनुसार वडा नम्बर १ मा १ सय १३ महिला र १ सय ४२ पुरुष गरी कुल २ सय ५५ ले कोभिड १९ विरुद्घको भ्याक्सिन लगाएका छन् ।यसैगरी, वडा नम्बर २ मा २ सय २६, वडानम्बर ९ मा ४ सय ५०, वडा नम्बर १२ मा २ सय ४५ र वडानम्बर १४ मा २ सय २५ जनाले जोन्सन एण्ड जोन्सन कम्पनीको खोप लिएको सचिवालय संयोजक वरालले बताए ।
नगरपालिकाले कोभिड १९ विरुद्घको यो खोप लगाउनका लागि यसअघि कुपन वितरण गरेको थियो । खोपकेन्द्रमा हुने अनावश्यक भीडलाई नियन्त्रण र खोपलाई व्यवस्थित गर्नका लागि कुपनको व्यवस्था मिलाइएको मेचीनगर नगपालिकाका प्रेस संयोजक लक्ष्मी उप्रेतीले बताए ।
‘मेचीनगरको १५ मध्ये ७ वटा वडामा बुधबार कोभिड १९ बिरुद्धको जोन्सन एण्ड जोन्सन खोप लगाउने योजना थियो ’ नगगरप्रमुख आचार्यले भने—‘एकै पटक मात्रै लगाए हुने अमेरिकन कम्पनीको जोन्सन खोप ५० देखि ५४ बर्ष उमेर समुहका ब्यक्तिलाई मेचीनगरको १, २, ५, ६, ९, १२ र १४ नम्बरका वडावासीले व्यवस्थितरुपमा खोप लिए ।
अब बाँकी रहेका वडाहरुमा खोप कार्य निरन्तर हुने छ ।’ ३, ४, ७, ८, १०, ११, १३ र १५ नम्बर वडामा साउन २१ गते जोन्सनको खोप सञ्चालन हुने नगरपालिकाको स्वास्थ्य शाखाले जनाएकोछ । नगरप्रमुख आचार्यले क्रमस सवै नगरवासीलाई कोभिड १९ विरुद्घको खोप उपलब्ध गराउने बताए ।
Discussion about this post