अस्ताउँदो सुर्यलाई अर्घ दिँदै भक्तजन

मेचीनगर, २४ कात्तिक । आज साँझ अस्ताउँदो सूर्यलाई अर्घ दिएर छठ पर्व मनाइएको छ ।

कात्तिक शुक्ल चतुर्थीदेखि सप्तमीसम्म सूर्यदेवको आराधना, उपासना र पूजा गरी मनाइने यो पर्व आज साँझ र भोलि बिहान ठूलो उत्साहका साथ मनाउने चलन छ ।

केहि वर्ष अघिसम्म मधेशी समुदायले मात्र मनाउने गरिएको यो पर्व पछिल्लो समय सबै जातजाति र समुदायले मनाउँन थालेका छन् ।

हरेक वर्ष झै यस वर्ष पनि मेचीनगरको निन्दा नदीमा सूर्यको पूजा आरधना गर्न ठूलो संख्यामा भक्तजनहरु सहभागी बनेर अस्ताउँदो सूर्यलाई अर्घ दिएका छन् ।

विधिपूर्वक छठी माताको उपासना गर्नेहरुको हरेक मनोकामना पुरा हुने जनविश्वास रहेको छ । रोग निवारण तथा सन्तान प्राप्तिको लागि छठीमाताको ब्रत बस्ने चलन रहेको निन्दा छठ पूजा व्यवस्थापन समितिका अध्यक्ष शिव शंकर शाहले बताए ।

चार दिनसम्म मनाइने यो पर्वको पहिलो दिन नहाय खाय अर्थात नुहाइ धुवाइ गरेर पूजा आराधना गरेर खाना खाने, दोस्रो दिन खरना अर्थात दिनभर ब्रत बसेर साँझको समयमा घरमै छठीमाइको विधि पूर्वक पूजा गरेर प्रसाद ग्रहण गर्ने, तेस्रो दिन साँझ अस्ताउँदो सूर्यलाई अर्घ दिएर प्रसाद चढाउने र चौथो दिन बिहान उदाउँदो सूर्यलाई अर्घ दिएर फलफूल चडाएसँगै छठी पुजा सम्पन्न हुने उनले बताए ।

उनले भने, ‘यो पर्वको ठूलो महत्व छ, मनोकामना पुरा हुने भएपछि सवै समुदायले यो पर्व मनाउने क्रम सुरु भएको छ ।’ निन्दा नदीमा छठीमाताको पूजा हेर्न साँझामा ५ हजार र विहान करिव १० हजारको संख्यामा मानिसहरु सहभागी हुने गरेको शाहको भनाइ छ ।

पूजा व्यवस्थापन समितिका उपाध्यक्ष मनोज पोद्दारले छठी माताको उपासना गर्नेहरुको सख्या हरेक वर्ष बढ्दै गएको बताए ।

‘सन्तानको सुख प्राप्तिको लागि यो ब्रत बस्ने चलन छ’ पोद्दारले भने, – ‘विधिपूर्वक पूजा आराधना गरेर छठीमातासँग भागल गर्दा सूर्यदेवताले आर्शिवाद दिनु हुन्छ । आफ्नो १० वर्षसम्म सन्तान नभएपछि छठी माताको ब्रत बसेर भाकल गरेपछि २ सन्तान प्राप्त भएकोले छठी माता प्रति पूर्ण विश्वास रहेको छ ।’

छठ पर्वमा झापामा विशेषगरी मेची, निन्दा, फूलबासा, बिरिङ, कनकाई माई लगायतका नदीमा ठूलो संख्यामा भक्तजनहरु सहभागी हुने गरेका छन् । भोलि विहान उदाउदो सुर्यलाई अर्घ दिएपछि यसवर्षको छठ पर्व विधिवत रुपमा समाप्त हुनेछ ।