देउमानको प्यानल घोषणा : उपसभापतिमा पाण्डे र भट्टराई, सचिवमा हुमागाई र बिमली

झापा, ८ मंसिर । नेपाली कांग्रेस झापाको सभापतिका उम्मेद्वार उम्मेद्वार देउकुमार थेवेले प्यानल घोषणा गरेका छन् ।

देउकुमार थेबे जिताउ अभियानको सचिवालयमा बुधबार आयोजित पत्रकार सम्मेलनमा सभापति पदका उम्मेद्वार थेबेले आफ्नो प्यानलका पदाधिकारीको नाम सार्वजनिक गर्दै उपसभापति पदमा मेचीनगरका केशवराज पाण्डे र दमकका शेरबहादुर भट्टराई उम्मेद्वार रहेको जानकारी दिए ।

यसैगरी, सचिवमा पत्रकार कृष्ण हुमागाई र नविन बिमली, सहसचिवमा कालेन्द्र राजवंशी र कमल भण्डारी उम्मेद्वार रहेको घोषणा गरेका छन् ।

आफ्नो टिम समावेशी र जुझारु भएको बताउँदै थेवेले पाँचै जना पदाधिकारीका उम्मेद्वार जिल्लाको पाँच वटै क्षेत्रका भएको बताए ।

उनले पार्टीको १३ औं महाधिवेशनमा आफुलाई सर्वसम्मत सभापति बनाउन भएको भद्र सहमतिको प्रसंग कोट्याउँदै आफुले अग्रज नेताहरुको समर्थन पाएको र साझा उम्मेद्वार भएको दावी गरे ।

उनले आगामी दिनमा पार्टीलाई चुस्त दुरुस्त बनाएर लैजान आफू नेतृत्वको टिमलाई जिताउन सम्पूर्ण क्षेत्रीय प्रतिनिधिसमक्ष आग्रह समेत गरे ।

घोषणा कार्यक्रमका प्रमुख अतिथि केन्द्रीय सदस्य केशवकुमार बुढाथोकीले झापा कांग्रेसको नेतृत्वमा ‘बाघ’ नै आउनुपर्ने धारणा राखे । उनले थेबेलाई शक्तिशाली र प्रभावशाली उम्मेद्वारको रुपमा बाघको संज्ञा दिए ।

केन्द्रीय सदस्य सुधिरकुमार शिवाकोटीले राजनीतिमा भद्र सहमति हुने बताउँदै भद्र सहमतिको पालना गर्नुपर्नेमा जोड दिए ।

नेपाली कांग्रेस झापाका सभापति उद्वव थापाले उम्मेद्वारहरुको परिचय गराउँदै देउकुमार थेवेको टीम जुझारु र समावेशी भएको र शिक्षा, पत्रकारिता, राजनीति एवं सामाजिक क्षेत्रमा क्रियाशील ब्यक्तित्वहरु समावेश भएको बताए ।

पार्टीका केन्द्रीय सदस्य गोपालकुमार बस्नेतको सभापतित्वमा सम्पन्न कार्यक्रममा पूर्व सांसद डिल्लीप्रसाद सिटौला लगायतले मन्तब्य ब्यक्त गरेका थिए ।