झापा, १८ मंसिर । राजतन्त्र र हिन्दू राज्य स्थापनाको मुद्धा बोकेको राष्ट्रिय प्रजातन्त्र पार्टी (राप्रपा)को नयाँ नेतृत्व चयनका लागि आज मतदान भइरहेको छ ।
काठमाडौंमा आयोजित राप्रपाको एकता महाधिवेशन अन्तर्गत नयाँ कार्यसमिति चयन गर्न शनिबार मध्यानह १२ बजेदेखि मतदान सुरु भएको हो ।
अध्यक्ष पदमा उम्मेद्वार बनेका कमल थापा र राजेन्द्र लिङ्देनबीचको प्रतिष्पर्धाले महाधिवेशनलाई झन् रोचक बनाएको छ । उनीहरुबीच तीव्र प्रतिस्पर्धा हुने अनुमान छ ।
दुवैले आफूले जित्ने बताउँदै आएका छन् । राप्रपाको नेतृत्व लामो समयदेखि गर्दै थापालाई लिङ्देनले चुनौती दिने नेता–कार्यकर्ताहरु बताउँछन् ।
लिङ्देनले चुनाव जितेमा राप्रपामा कमल थापा युगको अन्त्य हुनेछ । तर, थापा पार्टीभित्र कमजोर भने छैनन् ।
राप्रपाको १ सय ९९ सदस्यीय कार्यसमितिमध्ये मतदानबाट अध्यक्षसहित एक सय ४९ सदस्य चुनिने छन् । बाँकी ५० जना अध्यक्षले मनोनित गर्ने राप्रपाको संशोधित विधानमा उल्लेख छ ।
समावेशीसहित १४१ केन्द्रीय सदस्यका लागि २ सय ६४ जनाले उम्मेदवारी दिएका छन् ।
आठ सदस्यीय पदाधिकारीका लागि १६ जनाको उम्मेदवारी परेको छ । पदाधिकारीमा एक महिलासहित चार उपाध्यक्षका लागि आठ जना र एक महिलासहित तीन महामन्त्रीका लागि ६ जना चुनावी प्रतिस्पर्धामा छन् ।
Discussion about this post