मेचीनगर, ४ पुस । किराँत समुदायले मनाउने उद्यौली पर्व आइतबार देशभर विविध कार्यक्रमका साथ मनाइएको छ ।
नेपाल थामी समाज जिल्ला कार्यसमिति झापाले पनि पर्वकै अवसरमा मेचीनगर–८ स्थित भूमे थानमा विषेश पूजा अर्चनाका साथ तेस्रो जिल्ला अधिवेशन तथा बृहत सांस्कृतिक कार्यक्रम सम्पन्न गरेको छ ।
नेपाल थामी समाज जिल्ला अध्यक्ष लालबहादुर थामीको सभापतित्व तथा एमालेका केन्द्रिय सदस्य एवम् झापाका सहईन्चार्ज रविन कोइरालाको प्रमुख आतिथ्यता रहेको थियो ।
कार्यक्रममा प्रमुख अतिथि कोइरालाले नेपाल बहुजातिय, बहुुसंस्कृतिक बहुधार्मिक मुलुक भएको र धार्मिक सामाजिक र राजनीतिक हिसावले सवै जातजाति समान रहेको बताएका छन् ।
देशमा आएको राजनीतिक परिवर्तनमा थामी समुदायले पुर्याएको योगदानको स्मरण गर्दै संविधान सभाका सदस्य समेत रहेका कोइरालाले राजनीतिक परिवर्तनकै लागि जेठा थामीले आफ्नो ज्यानको बलिदान दिएको बताए ।
उनले थामी समुदायको आफ्नै भाषा, धर्म र संस्कृति रहेकोले त्यसको संरक्षणमा नेतृत्वले रुपान्तरणकारी भूमिका निर्वाह गर्नु पर्ने बताए । ‘नेपालको संविधान कुनै जाति र धर्मको लागि बाधक छैन, कोइरालाले भने, ‘यदि त्यो खाले समस्या देखिएमा संविधान संसोधन हुन्छ ।’
कार्यक्रमका विषेश अतिथि मेचीनगर नगरपालिका प्रमुख बिमल आचार्यले नगरमा रहेका सम्पूर्ण जातजातिको भाषा, धर्म र संस्कृतिको संरक्षणमा नगरपालिका हातेमालो गरेर अघि बढ्ने प्रतिवदद्घता व्यक्त गरे ।
‘नेपालमा अल्पसंख्यक समुदायको रुपमा रहेका थामी जातिको भाषा, लिपी, संरक्षणमा नगरपालिका अभिभावक बनेर उभिन्छ’, उनले भने,–‘तपाईहरु औपचारिक कार्यक्रममा मात्र सिमीत नहुनुहोस, संस्कार र संस्कृतिको संरक्षणमा जुट्नुहोस ।’
कार्यक्रममा विशेष अतिथि मेचीनगर उपप्रमुख मीना पोखरेल उप्रेती, नेपाल आदीवासी जनजाति महासंघ मेचीनगर समन्वय परिषदका अध्यक्ष ओमप्रकाश खापुङ, नेपाल थामी समाजका केन्द्रिय सदस्य कृष्ण थामी, मेचीनगर–८ का वडाध्यक्ष विकेन्द्र घिमाल, नेपाल मगर संघ झापाका सदस्य गम्भीरध्वज थापा, नेपाल थामी समाज इलामकी सचिव विष्णु थामी लगायतले जातिय भाषा, संस्कार र संस्कृतिको संरक्षणमा जुट्नु पर्ने बताए ।
कार्यक्रममा ख्याति प्राप्त कलाकारहरुले एकल तथा सामुहिक नृत्य तथा जातिय संस्कृति झल्कने गीतहरु प्रस्तुत गरेका थिए । सारीका थामीले स्वागत गरेको कार्यक्रमको सञ्चालन जिल्ला सचिव संञ्जय थामीले गरेका थिए ।
Discussion about this post