झापा क्षेत्र नं.–१ बाट स्वतन्त्र उठ्ने विदुर खतिवडाको घोषणा

मेचीनगर, ३२ असार । मेचीनगर नगरपालिका–६ काँकरभिट्टाका विदुरकुमार खतिवडाले संघीय निर्वाचनमा झापा क्षेत्र नं १ बाट स्वतन्त्र उम्मेदवारी दिने घोषणा गरेका छन् ।

लामो समयदेखि यातायात क्षेत्रमा काम गर्दै आएका ४६ वर्षीय खतिवडा चुनाव जितेको खण्डमा मजदुर क्षेत्रलाई मुख्य प्राथमिकता राखेर आफ्नो काम गर्ने बताउछन् ।

उनी आफूलाई मजदुर क्षेत्रमा काम गर्दै आएको भन्न रुचाउँछन् । खतिवडाले उम्मेदवारी घोषणा गरेको निर्वाचन क्षेत्रबाट यसअघिको चुनावमा नेकपाबाट प्रतिनिधि सभा सदस्यमा राम कार्की निर्वाचित भएका थिए ।

यातायातमा मुलुकलाई व्यवसायिक गराउँदै मजदुरमाथि भएको विभेद अन्त्य गर्ने उनको पहिलो एजेण्डा छ । भ्रष्टाचारलाई निर्मुल पार्ने पनि उनको योजना छ ।

०४९ सालदेखि उनी यातायात क्षेत्रमा क्रियाशील छन् । सुरुमा खतिवडाले बस चालक भएर काम गरे । लामो समय बस चालकको रुपमा काम गरेपछि उनी ७० सालदेखि यातायात क्षेत्रका विभिन्न संघ–संस्थामा नेतृत्वदायी भूमिकामा सक्रिय बने ।

मातृभूमि भलाई एण्ड एन्भेसमेन्ट कम्पनी प्रालिको क्षति मूल्यांकन समितिको संयोजक भएर जिम्मेवारी निर्वाह गरिसकेका खतिवडा हाल बुद्धशान्ति यातायात एण्ड अटो प्रालिका प्रबन्ध निर्देशको रुपमा छन् ।

निर्वाचित भएको खण्डमा ५१ बँुदे घोषणा पत्र अक्षरसपालन गराउन पहल गर्ने दृढता छ । घोषणामा ज्येष्ठ नागरिकलाई चौतारो, भ्रष्टाचार अन्त्य, मजदुरका समस्या, फोहोर विर्सजनका लागि डम्पिङ साइड, किसानलाई मल, अपाङ्गता भएका र सरकारी स्कुलमा कक्षा १२ सम्म निःशुल्क शिक्षा, नदि कटान भएका क्षेत्रको दुवैतर्फ तटबन्धन, विद्यालय छेउका पशुहाट हटाइने, स्वास्थ्य क्षेत्रमा सुधार गरिने, लागुऔषधलाई निराकरण गर्ने, सडक, पुलहरुको स्तरउन्नती गरिने लगायतका एजेण्डाहरु उल्लेख गरिएको छ ।

यसअघि उनले सामाजिक सञ्जाल फेसबुकमार्फत प्रदेश एकमा झापा क्षेत्र नं.१ को ‘क’ बाट आफ्नो स्वतन्त्र उम्मेदवारी दिने घोषणा गरेका थिए । तर पछिल्लो समय उनले प्रदेश खारेजको माग राख्दै प्रतिनिधि सभा सदस्यमा उठ्ने निधो गरेर फेसबुकमार्फत स्वतन्त्र उम्मेदवारी घोषणा गरेका हुन् ।

उनले झापा क्षेत्र नं. १ बाट ४० हजार बढी मत प्राप्त गर्ने दाबी गरेका छन् । झापा क्षेत्र नं. १ मा करिव ८२ हजार मतदाता रहेको अनुमान गरिएको छ ।