झापामा रबर उद्योगलाई अनुदान

झापा, ४ साउन । प्राकृतिक रबरको चोपलाई प्रशोधन गरी विभिन्न सामान उत्पादन गर्ने उद्देश्यले मेचीनगर नगरपालिका– ११ मा रबर उद्योग स्थापना गरिएको छ । उद्योगको स्थापनासँगै रबर किसानहरुमा खुशी छाएको छ ।

धाइजन पशुपालन तथा व्यावसायिक कृषि फार्मले सो उद्योग स्थापना गरेको हो । उद्योगका लागि प्रधानमन्त्री कृषि आधुनिकिरण परियोजना कार्यान्वयन इकाई झापाले आर्थिक बर्ष २०७८÷७९ मा ४० लाख अनुदान प्रदान गरेको छ । सो अनुदानले उद्योगको मुख्य मेसिन खरिद गरिएको छ ।

परियोजनाले सो कृषि फार्मलाई उद्योगको मेसिन खरिदका लागि ५० प्रतिशत अनुदान अन्तर्गत रु. २७ लाख २५ हजार र घर निर्माणका लागि ८५ प्रतिशत अनुदान अन्तर्गत १२ लाख ७५ हजार प्रदान गरेको छ ।

कार्यालयका सूचना अधिकारी रविन्द्र निरौलाले रबर उद्योगबाट गुणस्तीय गम, ग्लोब, बेलुन आदि बनाउन सहयोग पुग्ने जानकारी दिए । उनले उद्योगमा करिब सात जना स्थानीयवासीलाई ९ महिनासम्म रोजगारी समेत प्रदान गर्न सकिने विश्वास व्यक्त गरे ।

आर्थिक बर्ष २०७८÷७९ मा रबर खेती गर्ने साना किसानलाई सहयोग पुर्याउने उद्देश्यले परियोजनाले साना किसान प्राकृतिक रबर उत्पादक संघलाई रबर चोप संकलन गर्ने सामाग्री खरिदका लागि २० लाख र रबर डस्टिङ्ग मेसिन खरिदका लागि ५ लाख गरी २५ लाख अनुदान प्रदान गरेको छ ।

जिल्लामा आव २०७५÷७६ बाट रबर जोन सञ्चालनमा आएसँगै रबर किसानलाई प्रोत्साहन र खेती प्रवद्र्धन गर्नका लागि विभिन्न उपकरण खरिद र नर्सरी स्थापनाका लागि अनुदान प्रदान गरिदै आएको छ । चार बर्षमा परियोजनाले रबर जोनका लागि मात्र दुई करोड ११ लाख ५० हजार विनियोजन भएको रकममध्ये एक करोड ५७ लाख १७ हजार ८१० अनुदान प्रदान गरिसकेको छ । जसमध्ये रबर स्मोक हाउस निर्माणमा ८५ प्रतिशत र अन्यमा ५० प्रतिशतले अनुदान प्रदान गरिएको छ ।

झापामा करिब ५०० हेक्टर क्षेत्रमा रबर खेती हुँदै आएको छ । सामुदायिक बन, एग्रो फरेस्ट्रीलगायतका संस्थाले धेरै जग्गामा रबर खेती गरेका छन् भने करेसाबारीमा १० बोटदेखि दशौँ बिघा जग्गामा हजारौँ बोट रबर हुर्काउने किसानको संख्या झापामा थुप्रै रहेको छ ।

किसानले खेती नहुने पाखो र बगर जग्गामा रबर लगाएर प्रति बिघा रु चार लाखसम्म वर्षेनी आम्दानी गर्दै आएका छन् । रबरको चोप मात्र नभएर यसका दाउरा र काठ महँगोमा बिक्री हुने गरेको छ भने रबर खेती लगाएको स्थानमा मौरीपालन फस्टाउने गर्दछ ।

यस अघि कनकाई नगरपालिका–७ मा रु २० करोडको लगानीमा स्थापित कनकाई रबर उद्योग सञ्चालनमा आएको छ । तीन हप्तादेखि परीक्षणको रुपमा सञ्चालन गरिएको उद्योगलाई चाँडै व्यावसायिक रुपमा लैजाने उद्देश्य रहेको सञ्चालक बालकृष्ण सापकोटाले बताए । काठमाडौँ र झापाका लगानीकर्ताले साझेदारीमा कनकाई रबर उद्योग स्थापना गरेका हुन् ।

किसानबाट खरिद गरेको रबरको चोपलाई आधुनिक मेसिनमा प्रशोधन गरी पहिलो चरणमा जुत्ता चप्पलमा प्रयोग हुने सुलेसन (टाँस्ने पदार्थ) र रबर सोल उत्पादन गरिने सञ्चालक सापकोटाको भनाई छ ।

नेपालमा सयौँको संख्यामा रहेका जुत्ता चप्पल उद्योगले यहाँबाट उत्पादित सुलेसन र सोल प्रयोगमा ल्याउने सञ्चालकको अपेक्षा छ । हालसम्म ती उद्योगले यस्तो कच्चा पदार्थ भारतको केरला, भियतनाम र थाइल्यान्डबाट आयात गर्दै आएका थिए ।