सम्पादकले सोधे झापाका उम्मेद्वारहरुलाई प्रश्न

बिर्तामोड, २ कार्तिक । झापा–२ को संयुक्त निर्वाचन परिचालन समितिको आयोजनामा सम्पादकसँग उम्मेद्वारहरुको कार्यक्रम सम्पन्न भएको छ ।

बुधवार प्रेस चौतारी झापाको कार्यालयको भवनमा आयोजित कार्यक्रममा झापा–२ का प्रतिनिधि सभा सदस्य उम्मेद्वार देवराज घिमिरे, झापा–२ (१) का प्रदेशसभा सदस्य उम्मेद्वार एकराज कार्की र झापा–२ (२) का प्रदेशसभा सदस्य उम्मेद्वार चिन्तन पाठकसँग जिल्लाका सञ्चार माध्यमका सम्पादकसँग अन्तरसम्वाद गरिएको हो ।

नेकपा एमाले र राप्रपाले तालमेल गरी झापामा उम्मेद्वारी दर्ता गरेपछि दुई दलको संयुक्त निर्वाचन परिचालन समिति बनेको थियो । उक्त अन्तरसम्वादमा मन्तब्यको साटो सोझै उम्मेद्वारलाई सम्पादकले प्रश्न राख्ने विधि अपनाइएको थियो । सो कार्यक्रममा पत्रकारको जिज्ञासाको जवाफ उम्मेद्वारहरुले दिएका थिए ।

झापा–२ मा प्रतिनिधि सभा उम्मेदवार घिमिरेलाई आधा दर्जनजति राजनीतिक र निर्वाचन केन्द्रित प्रश्नहरु सोधिएको थियो । यस्तै प्रदेशसभा तर्फका उम्मेद्वारहरु पाठक र कार्कीले त्यति धेरै राजनीतिक प्रश्नको सामना गर्नु परेन । तर कार्कीले एक कार्यकाल सांसद भएर पनि कतिपय प्रतिवद्धता पूरा नगरेको भन्ने सोझो प्रश्नको सामना गर्नुपर्यो । यता पाठकले ‘हारको पर्याय चिन्तन’ हुने त होइन भनी पेचिलो प्रश्न सुन्नु पर्यो ।

महाकाली सन्धीको पक्षमा हस्ताक्षर गर्ने एक पात्रको नाताले तपाईंलाई त्यो गल्तीप्रति आत्मग्लानी भइरहेको छैन भनी एक सम्पादकको प्रश्नमाथि उत्तर दिँदै प्रतिनिधिसभाका उम्मेद्वार घिमिरेले महाकाली सन्धी नेपालको अहितमा नभएको प्रष्ट पारेका थिए । उनले सन्धी गर्दाताका गरिएको सम्झौता पूर्ण कार्यान्वनमा नआएकाले समस्या सिर्जना भएको अर्थ लगाएका थिए ।

एमाले पार्टी अनुशासन र विधिमा चल्ने पार्टी भएको चर्चा गर्दै नेता घिमिरेले अवसरवादीहरुले पार्टी छोड्दा कुनै फरक नपर्ने बताए ।

सो कार्यक्रममा पत्रकारहरुको जिज्ञासाको समाधान गर्दै निवर्तमान प्रदेशसभा सदस्य तथा सोही पदका उम्मेद्वार कार्कीले यसअघि निर्वाचित भएपछि अधिकांश बाचा पूरा गरेको बताए । बजेटको परिधिमा रहेर काम गर्नुपर्ने भएकाले भनेजति काम गर्न नसकिएको हुनसक्छ । तर पनि सो अवधिमा २० करोड रुपैयाँ आफ्नो क्षेत्रमा ल्याएर देखिने किसिमको काम गरेको उनको भनाई छ ।

प्रदेशसभाका अर्का उम्मेदवार चिन्तन पाठकले झापामा स्वतन्त्रको बजार नरहेको जिकिर गरे । आफूलाई हारको पर्यायका रुपमा चित्रित गर्नु असान्दर्भिक भएको भन्दै उनले एकपटक स्थानीय तह चुनावमा हारे पनि यसपटक त्यस्तो नहुने दाबी गरे ।

‘पहिला म टिकट बाँड्ने ठाउँमा थिएँ, कोही खुसी र धेरै रुष्ट पनि थिए । उतिबेलाको सन्दर्भ कोट्याउँदे उनले भने ‘अहिले त्यस्तो अवस्था छैन, पहिला भएका त्रुटीलाई पनि सच्याएर अघि बढेको छु ।’

क्षेत्रीय निर्वाचन परिचालन समितिका संयोजक हरिचरण शिवाकोटीको अध्यक्षतामा भएको कार्यक्रमको औचित्य माथि एमाले झापा जिल्ला प्रचार तथा प्रकाशन विभाग प्रमुख गोपाल काफ्लेले प्रकाश पारेका थिए ।

सम्पादकसँग उम्मेदवारहरु कार्यक्रम जिल्लाका पाँचवटै निर्वाचन क्षेत्रमा गर्ने तयारी रहेको जनाइएको छ । सो कार्यक्रमको सञ्चालन जिल्ला प्रचार विभागका सचिव प्रदीप परियारले गरेका थिए ।