मेचीनगर, १५ भदौ । विश्वभरी छरिएर रहेका दश करोड अग्रवालहरुकी कुलदेवी महालक्ष्मीको रथयात्रालाई आज काँकरभिट्टामा भव्य स्वागत गर्ने भएको छ ।
महालक्ष्मीको रथयात्रा भारतको पानीट्याङ्की हुँदै शुक्रवार काँकरभिट्टा आउने भएको हो ।
नेपाल प्रवेश गरे लगत्तै काँकरभिट्टाको हनुमान मन्दिरमा रथयात्रा उद्घाटन हुनेछ । रथयात्राको उद्घाटन संघीय संसद्की उपसभामुख इन्दिरा राना मगरले गर्ने भएकी छन् ।
रथयात्रा पहिलो दिन काँकरभिट्टा, धुलाबारी हुँदै बिर्तामोडमा रात्री विश्रामको कार्यक्रम रहेको मेचीनगरका रथयात्रा संयोजक समाजसेवी विजय डालमियाले जानकारी दिए ।
यसैगरी, भदौ १६ गते सुरुंगा, दमक, उर्लावारी हुँदै धरानमा रात्रि विश्रामको कार्यक्रम रहेको रथयात्राको मेची संयोजक पुनित बंशलले बताए ।
रथयात्रामा भारतबाट एउटा विद्युतीय रथगाडीसँग चार जना मात्र आउने र स्थानीय अग्रवाल समुदायले नै आफ्नो क्षेत्रमा रथयात्रालाई अघि बढाउने कार्यक्रम रहेको बंशलको भनाई छ ।
भदौ १७ गते धरानबाट हिँड्ने रथयात्रा दुहबी हुँदै विराटनगरमा रात्रि विश्राम गरेर भदौ १८ गते जोगवनी हुँदै भारततिर प्रस्थान गर्ने रथयात्राको विर्तामोड संयोजक वेदप्रकाश अग्रवालले जानकारी दिए ।
Discussion about this post