मेचीनगर, ११ कात्तिक । ‘स्वास्थ्य, पर्यावरण र पर्यटनको निम्ती साइकल’ भन्ने मुल नाराका साथ मकवानपुरका एकजना महिलासहित १३ जना साइकल यात्रीले आज काँकरभिट्टादेखि मेची–महाकाली यात्रा सुरु गरेका छन् ।
आज विहान ८ वजे पूर्वी सीमा नाका काँकरभिट्टादेखि मकवानपुरका एकजना महिलासहित १३ जना साइकल यात्रीले १० दिनको मेची–महाकाली यात्रा सुरु गरेका हुन् ।
साइकल यात्रीलाई मेचीनगर नगरपालिकाका निवर्तमान मेयर बिमल आचार्य लगायतका समाजसेवीहरुले खादा र अबिर लगाएर विदाई गरे ।
मकवानपुरको हिमालयन राइडर्स सोसाइटीले आयोजना गरेको साइकल यात्रामा पत्रकार, शिक्षक, कर्मचारी र व्यवसायीहरुको सहभागिता रहेको छ ।
कार्यक्रममा मेचीनगरका निवर्तमान मेयर आचार्य, सोसाइटीका संस्थापक अध्यक्ष चेतनाथ आचार्य लगायतले शुभकामना मन्तव्य राखेका थिए ।
यात्रा क्रममा पर्यटकीय स्थलहरुको अवलोकन र त्यसको प्रचारप्रसार गरिने सोसाइटीका उपाध्यक्ष राजु थापा मगरले बताए । यात्रालाई सहजताका लागि काँकरभिट्टादेखि दमकसम्म स्थानीय साइकल यात्रीले सहयोग गरेका थिए ।
सो यात्रा आज इटहरीसम्म पुग्ने योजना रहेको बताइएको छ । दश दिनमा महाकाली पुगेर समापन हुने नेपाल पत्रकार महासंघ मकवानपुरका पूर्वअध्यक्ष भानुभक्त आचार्यले बताए ।
कार्यक्रममा नेपाल पत्रकार महासंघ झापाका अध्यक्ष एकराज गिरी, प्रेस क्लब मेचीनगरका अध्यक्ष डम्बर बराल, सशस्त्र प्रहरी काँकरभिट्टा पोष्टका प्रमुख डीएसपी रोहित घिमिरे, उपाध्यक्ष जीआर धिताल, साइकल राइडर्स अर्जुन सुब्बा, हरि तिम्सिना लगायतको उपस्थिति रहेको थियो ।
कार्यक्रमको सहजिकरण मेची सामुदायिक सेवा केन्द्रका अध्यक्ष मुक्ति पौडेलले गरेका थिए ।
Discussion about this post