मेचीनगर, ६ पुस । मेचीनगर-८, ईटाभट्टा स्थित आदर्श माविको ५० काेठाकाे भव्य भवन बन्ने भएको छ ।
आज निर्माण हुन लागेकाे विद्यालय भवनकाे मेचीनगर नगरपालिकाका मेयर गोपालचन्द्र बुढाथोकीले शिलान्यास गरेका हुन् ।
कार्यक्रममा प्रमुख अतिथि मेयर बुढाथोकीले मेचीनगर नगरपालिकाको सिफारिस तथा विशेष योजना अन्तर्गत नै आदर्श माविले अनुदान प्राप्त गरेको बताए ।
उनले भवन निर्माणका लागि ठेक्का लगाउनेदेखि निर्माण सम्पन्न अवधिभर सम्पूर्ण व्यवस्थापन नगरपालिकाले गर्ने बताए ।
कार्यक्रममा उपमेयर मीना पाेखरेल उप्रेती, पूर्व मेयर विमल आचार्य, निमित्त प्रमुख प्रशासकीय अधिकृत एवम् शिक्षा शाखा प्रमुख होमनाथ भण्डारी, नगरका सामाजिक विकास शाखा प्रमुख ह्दय राजवंशी, भौतिक पूर्वाधार शाखा प्रमुृख चित्रा धिमाल, मेचीनगर-८ का वडाध्यक्ष गिरीराज धमला, जनप्रतिनिधि, पूर्व व्यवस्थापन समितिका पदाधिकारी, पूर्व प्रअ, छिमेकी विद्यालयका प्रअ, सञ्चारकर्मी, अभिभावक, शिक्षक, कर्मचारी लगायतकाे उपस्थिति रहेकाे थियाे ।
साे भवन निर्माणका लागि कुल ६ करोेड ९ लाख रुपैयाँ बजेट विद्यालयले प्राप्त गरेको छ ।
संघीय सरकारबाट प्राप्त विशेष अनुदान तथा मेचीनगर नगरपालिकाको योजनाअन्तर्गत पहिलो चरणमा ८ कोठाको सुविधायुक्त भवन बनिने विद्यालय व्यवस्थापन समितिका अध्यक्ष पूर्णबहादुर खड्काले जानकारी दिए ।
यो आर्थिक वर्षका लागि पहिलो चरणमा एक करोड १५ लाख रुपैयाँ बजेट निकासा भएर ठेक्का लागेसँगै भवन शिलान्यास भएको शिक्षक अभिभावक संघका अध्यक्ष भोलानाथ तिम्सिनाले बताए ।
यस विद्यालयले भर्खरै शैक्षिक गुणस्तर मापन केन्द्र (इआरो)मा देशकै ११ औँ र काेशी प्रदेशमा दाेस्राे स्थान हासिल गर्न सफल भएको खड्काले बताए ।
´वि.सं. २०२५ सालमा स्थापना भएको यस विद्यालय अहिले सम्म झुप्राेमा पढाइ भईरहेकाे थियाे` खड्काले भने-´अब याे बजेट आएसँगै सुविधा सम्पन्न भवनमा विद्यार्थीहरूले पठनपाठन गर्न पाउने भए ।`
उत्कृष्ट स्थान प्राप्त गरिरहेको विद्यालयलाई अब भवनको अभाव हट्ने विद्यालयका प्रधानाध्यापक कृष्ण पुरीकाे दावी छ ।
´यो वर्ष ४/४ कोठाको दुईतले भवन बन्नेछ । अर्को वर्ष २४ कोठा हुँदै वार्षिक क्रमिक रुपमा तीन वर्षभित्र करिव ५० कोठाको अत्याधुनिक भवन निर्माण हुनेछ’, उनले भने ।
व्यवस्थापन समिति अध्यक्ष पूर्णबहादुर खड्काको अध्यक्षतामा सम्पन्न कार्यक्रमकाे स्वागत एवम् कार्यक्रमको औचित्यमाथि प्रकाश प्रअ पुरीले र सञ्चालन शिक्षक लम्बोदर पौडेलले गरेका थिए ।
Discussion about this post