मेचीनगरमा नापतौलको ‘डोर सञ्चालन’ सम्पन्न

काँकरभिट्टा, ६ पुस । गुणस्तर तथा नापतौल कार्यालय भद्रपुरले मेची उद्योग बाणिज्य संघको सहजिकरणमा मेचीनगरको चार ठाउँमा गरिएको नापतौलको ‘डोर सञ्चालन’ सम्पन्न भएको छ ।

शुक्रबार चारआली पूर्व बस स्टेण्ड छेउ मंगलदिप सप्लायर्स परिसरमा आयोजना गरिएको नापतौलको ‘डोर सञ्चालन’ मा ३२ जना उद्योगी–व्यवसायीको ढक, तराजुहरुको चेकजाँच, नयाँ दर्ता र नविकरण गरिएको छ ।

चारआलीको ‘डोर सञ्चालन’ कार्यक्रममा मेची उद्योग बाणिज्य संघका अध्यक्ष खेमराज प्रसाई, उपाध्यक्ष निर्मला चौहान भण्डारी, कार्यसमिति सदस्य मानकुमार कटुवाल, कार्यकारी निर्देशक गोपाल वस्नेत, कर्मचारी हरिमाया बराल लगायत कर्मचारीहरुको सहभागिता रहेको थियो ।

त्यस्तै गुणस्तर तथा नापतौल कार्यालय भद्रपुरबाट सहायक निरीक्षक एवम् ‘डोर सञ्चालन’ टोली प्रमुख अमितकुमार कर्णको नेतृत्वमा कर्मचारीहरु विजयनन्द चौधरी, हरेराम महतो र कामिन राजबंशी खटिएका थिए ।

मेची उद्योग बाणिज्य संघको सहजिकरणमा गुणस्तर तथा नापतौल कार्यालय भद्रपुरले व्यवसायीहरुको नापतौल सम्बन्धीका औजार तथा उपकरणहरुको परिक्षण, नविकरण तथा नयाँ दर्ता लगायतका सेवाहरु दिने उद्देश्यले मेचीनगरको काँकरभिट्टा, ईटाभट्टा, धुलाबारी र चारआलीमा नापतौलको ‘डोर सञ्चालन’ गरिएको अध्यक्ष प्रसाईले बताए ।

मंगलबार काँकरभिट्टा सुपारी लाइन स्थित नेवारी खाजा घरको परिसरमा व्यवसायीहरुको सुविधाका लागि उक्त कार्यालयले ‘डोर सञ्चालन’ गरिएको थियो । काँकरभिट्टाका २८ जना व्यवसायीको ढक, तराजुहरुको चेकजाँच, नयाँ दर्ता र नविकरण गरिएको थियो ।

त्यस्तै बुधवार ईटाभट्टाको अधिकारी हार्डवेयर उत्तरमा ‘डोर सञ्चालन’ गरिएको थियो । ईटाभट्टाका २८ जना व्यवसायीको ढक, तराजुहरुको चेकजाँच, नयाँ दर्ता र नविकरण गरिएको थियो ।

यसैगरी विहीबार धुलाबारी स्थित मेची उद्योग बाणिज्य संघको सभाहलमा ‘डोर सञ्चालन’ गरिएको थियो । धुलाबारीका ३४ जना व्यवसायीको ढक, तराजुहरुको चेकजाँच, नयाँ दर्ता र नविकरण गरिएको थियो ।

नापतौल ‘डोर सञ्चालन’ टोली प्रमुख कर्णले ६५ जनाको नयाँ दर्तासहित १२२ जना व्यवसायी–उद्योगीको ढक, तराजुहरुको चेकजाँच र नविकरण गरिएको जानकारी दिए ।