बिर्तामोड, २० फागुन । ओलम्पिक खेलकुद प्रतियोगिताकाे एथलेटिक्समा नेपालबाट पहिलाे पटक भाग लिने धावक मेनुका राउतलाई उत्कृष्ट नारी सम्मान गरिने भएको छ ।
वीरता लेडी जेसीज पूर्व अध्यक्ष क्लब वर्ष २०२४ ले ११४ औं अन्तर्राष्ट्रिय नारी दिवसको अवसर पारेर राउतलाई उत्कृष्ट नारी सम्मान गर्ने भएको हो ।
मेचीनगर नगरपालिका-७ निवासी राउतले सन् १९८८ मा दक्षिण कोरियाको राजधानी सिओलमा आयोजना भएको विश्व ओलम्पिकमा नेपालकाे राष्ट्रिय खेलाडी भएर भाग लिएकी थिइन् ।
नेपालको इतिहासमै एथलेटिक्स महिला धावकको रुपमा नेपालबाट ओलम्पिक खेलकुदमा सहभागिता जनाउने राउत र काभ्रेपञ्चोक निवासी राजकुमारी पाण्डेको नाम सुनौलो अक्षरले लेखिएको विरता लेडी जेसीज पूर्व अध्यक्ष क्लबकी अध्यक्ष कञ्चना सिटौलाले बताइन् ।
पूर्व अध्यक्ष क्लबले उत्कृष्ट नारी छनोटका लागि नेपाल रेडक्रस सोसाइटी झापाका अध्यक्ष लोकराज ढकालको संयोजकत्वमा सदस्यद्वय पत्रकार अम्बिका भण्डारी र विरता जेसीजका पूर्व अध्यक्ष युवराज दाहाललाई चयन गरेको थियो ।
छनोट समितिकी सदस्य भण्डारीले आज पत्रकार सम्मेलनमा उत्कृष्ट नारी सम्मानका लागि मेनुका राउतलाई छनोट गरेको घोषणा गरिन् ।
क्लबले यसअघि उत्कृष्ट नारी सम्मानबाट समाजसेवी गिरीराजकुमार प्रसाई, शिक्षासेवी प्रभा घिमिरे र लिम्बू समुदायकी पहिलो महिला पाइलट जिना लिङ्देनलाई सम्मान गरिसकेको राष्ट्रिय जेसीजकी पूर्व उपाध्यक्ष स्वस्तिका आचार्यले जानकारी दिइन् ।
Discussion about this post