झापा, २३ फागुन । कोशी प्रदेश सरकारले प्रदेश नामकरणविरुद्ध भएको आन्दोलनका क्रममा मृत्यु भएका पदम लिम्बू लाजेहाङको परिवारलाई पाँच लाख रुपैयाँ दिने निर्णय गरेको छ ।
गत चैत ५ गते पशिचान पक्षधरहरुको समूहले गरेको आन्दोलनका क्रममा घाइते भएका लिम्बूको उपचारका क्रममा चैत १० गते मृत्यु भएको थियो ।
मृत्यु लगत्तै तत्कालिन प्रदेश सरकारले चैत १२ गते उनको परिवारलाई तीन लाख रुपैयाँ राहत दिने निर्णय गरे पनि परिवारले पाएका थिएनन् ।
बुधबार बसेको मन्त्रिपरिषद् बैठकले लिम्बूको परिवारलाई पाँच लाख रुपैयाँ राहत दिने निर्णय गरेको सरकारका प्रवक्ता तथा आन्तरिक मामिला तथा कानुनमन्त्री शमशेर राईले जानकारी दिए ।
अघिल्लो सरकारले राहत दिने निर्णय गरेपनि निकासा गरेको नदेखिएकाले आन्दोलनरत पक्षसँगको सहमतिपछि परिवारलाई सरकारले राहत दिने निर्णय गरेको मन्त्री राईले बताए । बैठकले पहिचान पक्षधरको आन्दोलनका क्रममा घाइते भएकाहरूको उपचारको खर्च व्योहोर्ने प्रक्रिया सुरु गर्ने निर्णय पनि गरेको छ ।
२०७९ फागुन १७ गते प्रदेशसभाले प्रदेशको नाम कोशी राखेपछि पहिचान पक्षधर आन्दोलनमा उत्रिएका थिए । २०७९ फागुन १७ गतेदेखि चर्किएको आन्दोलन गत माघ २६ गते सरकारसँगको पाँच बुँदे सहमतिपछि साम्य भयो । सहमतिपछि सरकारले मृतक परिवारलाई राहत दिने निर्णय गरेको हो ।
माघ २६ गते पहिचान पक्षधरले सरकारसँग वार्ता गर्दा प्रदेशको पुनः नामकरण सम्बन्धमा सहमति हुने राजनीतिक वातावरण बनाउन सरकार एवम् आन्दोलनरत पक्षबाट संविधानसम्मत राजनीतिक पहल एवम् छलफल अगाडि बढाउने सहमति भएको थियो ।
त्यस्तै आन्दोलनरत पक्षले आन्दोलनको स्वरुप परिवर्तन गरी शान्तिपूर्ण राजनीतिक गतिविधि अगाडि बढाउने र सरकारको तर्फबाट कुनै पनि प्रकारको बल प्रयोग नगर्ने, पहिचानको आन्दोलनका क्रममा भएका घाइतेहरुको उपचारको व्यवस्थापन र शहीद परिवारलाई क्षतिपूर्तिको व्यवस्था प्रदेश सरकारले प्रबन्ध गर्ने र पहिचानको आन्दोलनको क्रममा कारागारमा रहेकाहरुको रिहाइ र मुद्दा लागेका व्यक्तिहरुको मुद्दा फिर्ता लिने पनि सहमति भएको थियो ।
फागुन ९ गते फेरि बसेको बैठकले पुनः नामाङ्कनको प्रक्रियालाई अगाडि बढाउन सरकार र आन्दोलनरत पक्ष दुवैले ठोस कसरत गर्ने, पहिचान पक्षधर नेताहरुमाथि लागेका मुद्दा फिर्ता लिने, अदालतमा विचाराधीन मुद्दाहरुको विवरण र घाइतेहरुको उपचार खर्चको विवरण संकलन गरी पेस गर्न सरकार पक्षबाट २ जना र आन्दोलनरत पक्षबाट २ जना रहने गरी कार्यदल गठन गरेको थियो ।
यसैगरी, बुधबारको मन्त्रिपरिषद बैठकले उर्लाबारीमा भएको आगलागीमा घाइते भएका व्यक्तिको उपचार खर्च ब्यहोर्ने निर्णय गरेको छ ।
Discussion about this post