मेचीनगर, ९ बैशाख । झापामा रहेका विभिन्न सहकारीहरुका कार्यालयमा तोडफोड गरी चोरी गरेको आरोपमा ६ जना व्यक्तिहरु पक्राउ परेका छन् ।
कोशी प्रदेश प्रहरी विराटनगर, सुनसरी प्रहरीको सहयोगमा जिल्ला प्रहरी कार्यालय झापाको टोलीले इटहरीबाट उनीहरुलाई पक्राउ गरेको हो ।
जिल्ला प्रहरी कार्यालय झापाले पक्राउ परेका ६ जनालाई सार्वजनिक गरेको छ । पक्राउ पर्नेमा मकवानपुरको इन्द्रसरोवर गाउँपालिका–५ फाखेल घर भएका ३० वर्षीय सोमलाल स्याङ्तान, २६ वर्षीय सुजन स्याङ्तान, २५ वर्षीय बुद्ध स्याङ्तान, २२ वर्षीय सुनिल स्याङ्तान, २१ वर्षीय सुनिल भनिने सन्तबहादुर स्याङ्तान र मकवानपुरगढी गाउँपालिका–७ का २८ वर्षीय अजय राना मगर छन् ।
उनीहरूले तीस लाख १६ हजार ६८७ रुपैयाँ बराबरको चोरी गरेको जिल्ला प्रहरी कार्यालय झापाका प्रवक्ता एवम् डीएसपी कृष्णकुमार चन्दले जानकारी । उनीहरुले झापाका ११ वटा सहकारीमा चोरी गरेको खुलेको छ ।
उनीहरुको साथबाट ताला फोड्न प्रयोग भएको मार्तोल, पेन्चिस, पिलास र चोरी गर्ने बेला लगाइएका कपडासमेत प्रहरीले नियन्त्रणमा लिएको छ ।
उनीहरुलाई चोरीको कसुरमा जिल्ला अदालत झापाबाट ५ दिनको म्याद थपेर अनुसन्धान गरिरहेको प्रहरीको भनाई छ ।
Discussion about this post