आत्महत्या रोकथामको उपाय खोज्दै मेचीनगर

बाहुनडाँगी, २६ बैशाख । पछिल्लो समय मेचीनगरमा किशोर–किशोरीहरबाट आत्महत्या गर्ने क्रम बढेसँग समाज त्रसिद बन्दै गएको छ ।

यसको कारण र न्युनिकरणको उपाय खोज्नका लागि मंगलबार बाहुनडाँगीमा बढ्दो आत्महत्या न्यूनीकरणमा हाम्रो भूमिका, सकारात्मक सोचको प्रभाव गतिशील जीवनको आधार विषयक कार्यक्रम आयोजना गरिएको थियो । नारी सञ्चार गृह झापाको आयोजना र मेचीगर–४ नम्बर वडा कार्यालयको सहयोगमा कार्यक्रम वडाको सभाहलमा सम्पन्न भएको थियोे ।

कार्यक्रमका प्रमुख अतिथि ४ नम्बर वडाका वडाध्यक्ष अर्जुनकुमार कार्कीले पछिल्लो समय किशोर–किशोरीले आत्महत्या गर्ने क्रम बढेसँगै त्यसको अप्रत्यक्ष असर समाजमा पर्न थालेको बताए । उनले भविष्यको सम्भावना बोकेका बालबालिकालाई समयसँगसँगै चल्नुपर्नेतर्फ सचेत गराउँदै अमूल्य जीवनको सारलाई बुझेरअघि बढ्न आग्रह गरे ।

इलाका प्रहरी कार्यालय काँकरभिट्टाका प्रमुख एवम् डीएसपी मीमबहादुर लामाले झापामा आत्महत्याको अवस्था र बालबालिकाले आत्महत्या गर्नुको कारण प्रेम, आर्थिक अवस्था र उच्च महत्वाकांक्षा रहेको अनुसन्धानले देखाएको दावी गरे ।

त्यस्तै, मनोपरामर्शदाता एवम् धुलाबारी माविका प्रधानाध्यापक महेन्द्रविलास लुइँटेलले अभिभावक, शिक्षक–शिक्षिका तथा साथिहरुले विद्यार्थीहरुको मनको कुरा कसरी बुझ्न सकिन्छ, कुन कुरामा तनाव हुँदैछ लगायतका यावत विषयमा बुझ्न जरुरी रहेको बताए ।

उनका अनुसार पारिवारिक, शारीरिक वा सामाजिक कुनै कारणले उसले आत्महत्याको सोच बनाएको छ कि भनेर त्यो कुरा परिवारले सोच्नु र अनुसन्धान गर्नुपर्छ । उनले विद्यार्थीले बोल्दै गर्दा, विद्यालयमा बिदा माग्दै गर्दा पनि साथीहरूले उसको मनोविज्ञान बुझ्नुपर्ने कुरामा सचेत गराए ।

विद्यार्थीका तर्फबाट सरस्वती माविका संयोग शर्माले कार्यक्रमबाट धेरै कुरा सिक्ने अवसर पाएको र यसले आफ्नो जीवनमा ठुलो सिकाएको बताए । विद्यालयका तर्फबाट पशुपति माविका प्रधानाध्यापक लक्ष्मण प्रधानले समयसापेक्ष यस्ता कार्यक्रमहरु आयोजना गर्न आवश्यक रहेको र यसले विद्यार्थीमा सकारात्मक सोचाइको विकास हुने बताए ।

कार्यक्रममा पशुपति माविका प्रधानाध्यापक लक्ष्मण प्रधान, सरस्वती माविकी शिक्षक प्रतिनिधि अनिता थापा, अंशु एकाडेमीका प्रधानाध्यापक किरण अधिकारी, विद्या विकास विद्यालयका शिक्षक लगायत विभिन्न संघ–संस्थाका प्रतिनिधिहरुको उपस्थिति रहेको थियो । कार्यक्रममा बाहुनडाँगी आसपासका १५० जना भन्दा बढी विद्यार्थीको सहभागिता रहेको थियो ।

नारी सञ्चार गृह झापाकी अध्यक्ष रेजिना गौतमको अध्यक्षता, कार्यक्रमको स्वागत तथा औचित्यमाथि प्रकाश कार्यक्रम संयोजक विनिशा शर्माले र सञ्चालन जोश्ना श्रेष्ठले गरेकी थिइन् ।