वडा सचिव भट्टराईलाई सेवाग्राहीले कुटे

शिवसताक्षी, १७ जेठ । शिवसताक्षी नगरपालिका–१ का वडा सचिव नन्दीकेशर भट्टराई सेवाग्राहीबाट कुटिएका छन् ।

शिवसताक्षी नगरपालिकाका कर्मचारी भट्टराईलाई आफु अनुकुलको कागजात तत्काल नमिलाईदिएको भन्दै सेवाग्राहीले कुटपिट गरेका हुन् । उनी वडा नम्बर १ का वडा सचिव हुन् ।

वडा सचिव भट्टराई वडा कार्यालय परिसरमै पिटीएको घटनाका प्रत्यक्षदर्शीले बताए । प्रत्यक्षदर्शीका अनुसार वडा सचिवलाई दुई जना सेवाग्राहीले कुटे ।

इलाका प्रहरी कार्यालय झिलझिलेका प्रहरी निरीक्षक अनिश बुढाथोकीले वडा सचिव माथि आक्रमण गर्ने स्थानीय सोमनाथ बजगाई र निजका दाजु घनश्याम बजगाईंलाई पक्राउ गरेको बताए । उनका अनुसार विहीबार दिउँसो को यो घटनाको सूचना पाउने वित्तिकै उनीहरुलाई पक्राउ गरिएको हो ।

पक्राउ परेका दुवै जनालाई सम्मानित झापा जिल्ला अदालतमा कारबाहीका लागि मुद्दा दर्ता गरेर थप अनुसन्धान गर्न इलाका प्रहरी कार्यालय झिलझिलेको हिरासतमा राखिएको छ ।

नगरपालिकाका सहायक सूचना अधिकारी डिल्ली नेपालले वडा कार्यालयको क्यान्टिनमा वडा सचिव भट्टराईमाथि टाउको, अनुहार, शरीरका विभिन्न भागमा मुक्का प्रहार गरेको बताए । कर्मचारी आक्रमण गर्नेलाई हदै सम्मको कारबाहीको माग गर्दे शिवसताक्षी नगरपालिकाका कर्मचारीले विज्ञप्ती मार्फत प्रशासनसँग माग गरेका छन् ।

जन्मदर्ता सच्याउनका लागि बजगाई दाजुभाई वडा कार्यालयमा गएका थिए । आवेदकले ९ वर्ष अगाडि बनाएको जन्मदर्तामा बाबुको थरबाट जन्मदर्ता बनेको थियो । उक्त जन्म दर्ता तत्कालिन धरमपुर गाविस सचिव पूर्णसम्सेर कुँवरले बनाइदिएका थिए ।

आवेदक बजगाईले अहिले आफ्ना नानीको जन्म दर्तामा आमाको थर पनि समावेस गर्न माग गर्दै निवेदन दिएका थिए । बजगाईकी श्रीमती कुईकेल हुन् । जन्म दर्तामा कुईँकेल थर समावेसका लागि बजगाईले वडाध्यक्ष समक्ष निवेदन दिएका थिए । उक्त निवेदनमा वडाध्यक्ष लक्ष्मी चेम्जोङ नियमानुसार जन्म दर्ता सच्याउन सचिव भट्टराईलाई तोक लगाएका थिए ।

वडाध्यक्ष चेम्जोङले सच्याईदिनु भन्ने, सचिवले नटेर्ने भन्दै बजगाई दाजुभाईले सचिव भट्टराईमाथि मुक्का प्रहार गरेको नगरपालिकाले जनाएको छ । जन्म दर्ता सच्याउन दर्ता भएको मितिले १ वर्षमा सच्याउन पाईने कानुनी प्रावधान छ । तर, ९ वर्ष अघिको कागजात पत्र सच्याउन यतिवेला वडा सर्जमिन गर्नुपर्ने स्पष्ट व्यवस्था छ ।

कुटपिटबाट घाइते बनेका भट्टराईको बिर्तामोड स्थित बिर्तासिटी अस्पतालमा उपचार भइरहेको बताइएको छ ।