मेचीनगर, २६ असार । नेपाली काँग्रेसका महामन्त्री एवम् झापा क्षेत्र नं.१ का संघिय सांसद विश्वप्रकाश शर्माले अब नेपालमा राजनीतिक अस्थिरताको अन्त्य हुने बताएका छन् ।
आज काँकरभिट्टा खानेपानी उपभोक्ता तथा सरसफाइ संस्थाले मेचीनगर-५ सिर्जना चाेकमा ४५० घन लिटरकाे ओभरहेड ट्याङ्की निर्माण गर्ने शिलान्यास कार्यक्रममा उनले यस्तो कुरा बताएका हुन् ।
प्रमुख अतिथि सांसद शर्माले लोकतन्त्रको दीगोविकास, राजनीतिक दलहरुप्रति जनताको बढ्दै गएको निरशालाई चिर्न केपी शर्मा ओलीको नितृत्वमा नयाँ सरकार गठनको प्रक्रियामा नेकपा एमाले र नेपाली कांग्रेसबीच सहमती भएकोले अब नेपालमा राजनीतिक अस्थिरताको अन्त्य हुने बताए ।
शर्माले मेचीनगरको दिगो विकासको लागि यहाँका सबै राजनीतिक दल, स्थानीय सरकार, संघीय र प्रदेश सांसदहरु एक मत भएरअघि बढ्ने गरेकाे बताए ।
उनले खानेपानीको ओभरहेड ट्याङ्की निर्माणका लागि ५ करोड बजेट रकमान्तर भएर आएकोले ढुक्क भएर काम गर्न निर्माण ब्यवसायी र समितिलाई सुझाव दिएका थिए ।
कार्यक्रममा संविधान सभा सदस्य एवम् मेचीनगरका प्रथम मेयर रविन कोइरालाले २०७२ सालमा जारी भएको संविधान प्रयोगका क्रममा देखिएका केही जटिलता, उल्झनहरुलाई समाधान गर्न संविधान संशाेधन गर्नुको विकल्प नभएकोले राष्ट्रिय सहमतिको सरकारको आवश्यक भएको बताए ।
संविधान संशाेधनका लागि दुई तिहाइ बहुमत संसदमा चाहिने भएकोले राष्ट्रिय सहमति आवश्यक पर्ने उनकाे जाेड थियाे ।
संविधान संशाेधनको एजेण्डामा ७५३ वटा पालिकालाई पूनःगठित गर्ने कुरा चलेको बताउँदै उनले मेचीनगरको विकासको खाका कोर्दा त्यस कुरालाई समेत ध्यान दिनु पर्ने बताए ।
उनले झापामा ७/८ वटा मात्र पालिका हुने सम्भावना रहेकाे दावी गरे ।
मेचीनगर नगरपालिका मेयर गोपालचन्द्र बुढाथोकीले मेचीनगरको दीगो विकासको लागि गुरु योजना बनाउने कामअघि बढाएको बताए ।
कार्यक्रममा मेचीनगर पालिकाकी उपमेयर मीना पोखरेल उप्रेती, काँग्रेसका झापाका उपसभापति केशवराज पाण्डे, कांग्रेस क्षेत्रीय सभापति इन्द्रबहादुर बुढाथोकी, नेकपा एमालेका मेचीनगर अध्यक्ष राजु कार्की, नेकपा माओवादी केन्द्र मेचीनगरका अध्यक्ष राजन चिमरिया लगायतले शुभकामना मन्तव्य व्यक्त गरेका थिए ।
खानेपानी कार्यालयका प्रमुख दीपक पाेखरेलले १० कराेड ४८ लाखकाे लागतमा ३० महिनामा सम्पन्न हुने गरि ग्लाेवल वितेश जेभिलाई ठेक्का सम्झाैता भएको बताए ।
सम्झाैता अनुसार २ वटा ओभरहेड ट्याङ्की, ४ वटा बाेरिङ, २ वटा ट्रिटमेन्ट सिस्टम लगायतका सामाग्री निर्माण हुनेछ ।
काँकरभिट्टा खानेपानी उपभोक्ता तथा सरसफाइ संस्थाका अध्यक्ष राेहितकुमार बुढाथोकीकाे अध्यक्षता, स्वागत उपाध्यक्ष गोविन्द गिरीले र कार्यक्रमको सञ्चालन सचिव विशाल तामाङले गरेका थिए ।
Discussion about this post