‘प्रदेश निजामती सेवा नियमावली’ स्वीकृत

झापा, १० साउन । कोशी प्रदेश सरकारले प्रदेश निजामती सेवा नियमावली स्वीकृत गरेको छ ।

कोशी प्रदेश मुख्यमन्त्री तथा मन्त्रीपरिषदको बैठकले कोशी प्रदेश गुनासो व्यवस्थापन निर्देशिका पनि स्वीकृत गरेको छ ।

उक्त निर्देशिका स्वीकृत गरेसँगै प्रदेशका जनताले कुनै प्रश्न, जिज्ञासा र सूचना माग गर्न पाउने मौलिक हकलाई सुरक्षित गरेको सरकारका प्रवक्ता तथा आन्तरिक मामिला तथा कानून मन्त्री लिलाबल्लभ अधिकारीले जानकारी दिए ।

मन्त्रिपरिषदको बैठकले प्रदेश किताब खाना कार्य सञ्चालन निर्देशिका २०८० र राहत वितरण सम्बन्धी मापदण्डको दोस्रो संशोधन स्वीकृत गरेको छ ।

राहत वितरण मापदण्ड संशोधन गरेपछि अब प्राकृतिक विपत्ति तथा आगलागीजन्य प्रकोपमा परी मृत्यु भएका व्यक्तिलाई १ लाख रुपैयाँ दिने, एकै परिवारका धेरै सदस्यको मृत्यु भएमा थप प्रतिव्यक्ति ५० हजार दिइने भएको छ ।

यसअघि एकै घरका जतिजनाको मृत्यु भएपनि राहत स्वरुप १ लाख रुपैयाँ मात्रै दिन पाउने व्यवस्था थियो ।