हात्तीमैत्री बन्न बाहुनडाँगीका जनताबाट सिक्नुपर्छ : मन्त्री कार्की

बाहुनडाँगी, २८ साउन । खानेपानी, सिँचाई तथा उर्जा मन्त्री एकराज कार्कीले हात्तीमैत्री बन्न बाहुनडाँगीका जनताबाट सिक्नु पर्ने बताएका छन् ।

आज बाहुनडाँगीमा रेपिड रेस्पोन्स टिमले हात्ती दिवसको अवसरमा मन्त्री कार्कीले यस्तो कुरा बताएका हुन् ।

गत फागुन ९ गते मानव हात्ती सहअस्तित्वको लागि बाहुनडाँगीदेखि उदयपुर जिल्लाको वेलवासेसम्म पूर्व मुख्यमन्त्री कार्कीसहितको टोलीले सात दिनको हात्ती मैत्रीपूर्ण पदमार्ग गरेको थियो । मन्त्री कार्कीले उक्त अभियान सफल नभएको दावी गरे ।

‘सरकारले त्यसबेला खर्चमात्र गर्याे’, मन्त्री कार्कीले भने– ‘त्यहि खर्च यहाँ हात्तीका लागि गरेको भए हुन्थ्यो । अभियानमा खर्च मात्र भयो सफल भएन ।’

उनका अनुसार मेरै घर पनि हात्तीले चार पटक भत्कायो । हात्तीलाई हिड्ने बाटो चाहिन्छ । हात्तीलाई चलायो भने विगार गर्न सक्छ । भएको त्यहि हो ।

मेचीनगर नगरपालिका उपमेयर मीना पोखरेल उप्रेतीले बाहुनडाँगीका जनतालाई पर्यटनसँग जोडेर हात्ती मैत्री बनाउन वडा र नगरपालिका लागिरहेको बताइन् ।

कोशी प्रदेश सरकारको वन, पर्यटन तथा वातावरण मन्त्रालयका सचिव विशाल घिमिरेले मानव हात्ती सह अस्तित्वमा अभियान फलदायी बन्दै गएको बताए ।

उनले हालसम्म हात्तीको आक्रमणबाट ६८ जना मान्छेको मृत्यु भएको र त्यबीचमा १९ वटा हात्ती मरेको जानकारी दिए ।
गत फागुन ९ गते बाहुनडाँगीदेखि उदयपुरसम्म हात्ती सहअस्तित्वका लागि मुख्यमन्त्री पदमार्ग जागरण अभियान सञ्चालन गरिएको उनले बताए ।

उनका अनुसार हात्तीलाई पर्यटनसँग जोडेर हात्ती मैत्री बनाउन होमस्टे, बाली बीमा लगायतका कार्यक्रम बजेटमा समावेश गरिएको छ ।

भारत नक्सलवाडी पञ्चायतकी उपसभापति सजनी सुब्बाले नेपाल र भारतको सीमामा हात्तीको समस्या कहिलै समाप्त हुने दावी गरिन् । उनले त्यसका लागि समस्याको समाधान मिलेर गर्नु पर्छ ।

भारत पश्चिम बंगाल अन्तरगत पर्यटन विभागका सल्लाहकार पृतम राज वशुले बाहुनडाँगीका जनताले हात्तीलाई अगाडि बढाएर पर्यटन मैत्री बनेको विश्वले थाहा पाइसकेको बताए ।

उनले बंगाल सरकार सिलीगुडीका आइजीपीले समेत हात्ती सम्बन्धि इन्डो–नेपाल फ्रेन्डसीव कार्यक्रम गर्न इच्छुक रहेको जानकारी दिए । उनका अनुसार हात्ती र मानवबीचको द्वन्द कम गर्न काठमाडौं र दिल्लीले चासो दिनु पर्छ । कार्यक्रममा पत्रकार चन्द्र भण्डारी लगायतले शुभकामना मन्तव्य व्यक्त गरेका थिए ।

मेचीनगर–४ का वडाध्यक्ष अर्जुनकुमार कार्कीले बाहुनडाँगीमा हात्ती र मानवबीचको सहअस्तित्वका कारण समाज संमृद्वि बन्न थालेको बताए । उनले हात्तीमैत्री बनाउन पर्यटनसँग जोडेर समुदायमा रुपान्तरण गर्नुपर्ने बताए ।

सोही अवसरमा उज्जयालो नेपाल बर्दियाका प्रमुख रमेश थापाले बाहुनडाँगीका किसानको हात्तीबाट घर भत्काए बीमाको व्यवस्था गरिदिएका छन् ।

कार्यक्रममा हात्तीबाट घर भत्कीएका स्थानीय झुमामाया राईलाई घरबीमा बापत २२ हजार ६० रुपैयाँ उपलब्ध गराइएको छ ।

कार्यक्रममा म्युजिकल चियर प्रतियोगिता, चित्रकला प्रदर्शनी, छेलो हान्ने प्रतियोगिता, अन्तर सीमा लठारो तान्ने प्रतियोगिता, नेपाल र भारतका आमा समुहबीच मैत्रीपूर्ण फुटबल प्रतियोगिता, लोकल कुखुरा प्रदर्शनी (प्रोत्साहन कार्यक्रम) लगायतका प्रतियोगिता गरिएको थियो । उक्त प्रतियोगिता विजेतालाई कुखुराको भाले र अन्य पुरस्कारहरु प्रदान गरिएको थियो ।

रेपिड रेस्पोन्स टिमका अध्यक्ष न्युटन कार्कीको अध्यक्षतामा सम्पन्न कार्यक्रमको स्वागत वडाध्यक्ष अर्जुनकुमार कार्कीले र सञ्चालन बाहुनडाँगी जेसीजका अध्यक्ष देबु बानियाँले गरेका थिए ।

भिडियो हेर्नुहोला ।