झापा, ९ भदाै । १६ वर्षीया किशोरीमाथि सामूहिक बलात्कार गर्ने अर्जुनधाराका सातमध्ये ६ जना पक्राउ परेका छन् ।
जिल्ला प्रहरी कार्यालय झापाका प्रवक्ता एवम् डीएसपी कृष्णकुमार चन्दले किशोरी बलात्कारमा संलग्न ७ जना मध्ये ६ जना पक्राउ परेकाे जानकारी दिए ।
उनलाई अलग-अलग स्थानमा पुर्याएर एकैरात ७ जनाले सामूहिक बलात्कार गरेकाे प्रहरीकाे भनाई छ ।
उनलाई एक ठाउँमा ३ जना र अर्को ठाउँमा पुर्याएर ४ जनाले बलात्कार गरेकाे बताइएकाे छ ।
चन्दले १६ वर्षीया किशोरीलाई शुक्रबार राति अर्जुनधारा क्षेत्रकाे दुई ठाउँमा बलात्कार गरेकाे पुष्टि गरे ।
सुरुमा हटिया लाग्ने स्थानको फलैँचा र त्यसपछि होटेलमा लगेर बलात्कार गरिएको थियाे ।
उनीहरूले किशोरीलाई राति ८ वजेतिर अर्जुनधारा-८ नयाँ बजार पुर्याएर बाख्रा हटिया लाग्ने स्थानको फलैँचामा बलात्कार गरेको प्रहरीको प्रारम्भिक अनुसन्धानबाट खुलेको छ ।
त्यसपछि किशोरीलाई राति ११ बजेतिर अर्जुनधारा-७ स्थित लंका होटेल एन्ड रिसोर्टमा पुर्याइएकाे थियाे ।
अर्जुनधारा-८ का १९ वर्षीय सुनिल राजवंशीले वडा नम्बर ७ मा सञ्चालन गर्दै आएको होटेलमा लगेर होटेल मालिकसहित अरू ४ जनाले बलात्कार गरेको डीएसपी चन्दकाे दावी छ ।
उनका अनुसार होटेल सञ्चालक राजवंशीसहित होटेलमा ‘कुक’को काम गर्दै आएका अर्जुनधारा-७ का २० वर्षीय सुदीप श्रेष्ठ, सुजन डाँगी र सञ्जीव तामाङले बलात्कार गरेको प्रारम्भिक अनुसन्धानबाट खुलेको छ ।
सुरुमा किशोरीलाई अर्जुनधारा नगरपालिका-५ का १९ वर्षीय अनीश लिम्बू, अर्जुनधारा-८ का ३४ वर्षीय सरोज राई र २५ वर्षीय केशव मगरले बलात्कार गरेको प्रहरीकाे भनाई छ ।
प्रहरीले बलात्कारमा संलग्न भएको आरोप लागेका होटेलका सञ्चालक सुनिलसहित ६ जनालाई पक्राउ गरेको छ ।
सञ्जीव बाहेक सबै पक्राउ परेका छन् । सञ्जीव फरार रहेकाले खोजी कार्य भइरहेको प्रहरीले जनाएको छ । प्रहरीले उक्त घटना बारे शनिबार साँझ मात्रै जानकारी पाएको थियो ।
किशोरीमाथि सामूहिक बलात्कार भएको घटनाकाे जाहेरी बेलुका ७ बजेतिर इलाका प्रहरी कार्यालय अनारमनीमा परेको थियाे ।
बलात्कारमा संलग्नको खोजी र पक्राउका लागि प्रहरी निरीक्षक सन्तोष राईको नेतृत्वमा प्रहरी परिचालन गरिएकाे थियाे ।
बलात्कारबाट पीडित भएकी किशोरीको उपचार भइरहेको र अवस्था सामान्य रहेको प्रहरीकाे भनाई छ ।
पक्राउ परेकाविरुद्ध जबरजस्ती करणी मुद्दा चलाइने डीएसपी चन्दले जानकारी दिए ।
Discussion about this post