मेचीनगर, ९ असोज । मानव सेवा आश्रममा अशक्त रहेका ज्येष्ठ नागरिकहरुलाई शौचालय जान बोकेरै लानु, ल्याउनु पर्ने अवस्था भएपछि मेचीनगर नगरपालिकाले आज आश्रमलाई दुई वटा ह्विल चेयर प्रदान गरेको छ ।
आज मेचीनगर नगरपालिकाकी उपमेयर मीना पोखरेल उप्रेतीले मेचीनगर–४, बाहुनडाँगी स्थित मानव सेवा आश्रमका कर्मचारीहरुलाई २ वटा ह्विल चेयर प्रदान गरेकी हुन् ।
बुधवार दिउँसो कार्यालयमा कार्यवाहक मेयर समेत रहेकी उप्रेती, प्रमुख प्रसाशकीय अधिकृत अग्निप्रसाद अधिकारी, महिला विकास अधिकृत जयन्ती खरेल, नगरपालिकाका कानूनी सल्लाहकार अधिवक्ता इन्द्रकमल प्रधान लगायतको उपस्थितिमा आश्रमका कर्मचारी गंगा थापा लगायतको टिमलाई ह्विल चेयर दिइएको थियो ।
केहि दिनअघि आश्रमकी कर्मचारी थापाले उपमेयर उप्रेतीलाई भेटेर आश्रम रहेका वृद्व–वृद्वा आमाबुबालाई शौचालय जानु पर्दा बोकेरै लानु, ल्याउनु पर्ने अवस्था बारे जानकारी गराएकी थिइन् ।
उपमेयर उप्रेतीले सोही कुरालाई ध्यान दिएर वृद्व–वृद्वा आमाबुबालाई सहजहोस् भन्ने उदेश्यले आज २ वटा ह्विल चेयर आश्रमका कर्मचारीलाई हस्तान्तरण गरिएको कार्यालयले जनाएको छ ।
बेवारिसे अवस्थामा सडक पेटीमा भौतारिरहेका सडक मानव र स्थानीय अशक्त ज्येष्ठ नागरिकहरुलाई नगरपालिकाले उद्धार गरेर आश्रममा राख्ने गरिएको छ ।
स्थानीय रामबहादुर प्रधान दम्पतीले दुई विगाह ५ कठ्ठा जग्गा दान गरेपछि सोही जग्गामा अहिले मानव सेवा आश्रम सञ्चालनमा छ । उक्त आश्रममा हालसम्म उद्धार गरिएका २१ जनालाई रेखदेख गरिरहेको छ ।
Discussion about this post