विद्यार्थीले राजनीतिमा भन्दा शिक्षामा जोड दिनुपर्छ : लिङ्देन (भिडियोसहित)

मेचीनगर, १९ असोज । राष्ट्रिय प्रजातन्त्र पार्टीका अध्यक्ष राजेन्द्रप्रसाद लिङ्देनले विद्यार्थीहरुलाई राजनीतिमा कम र शिक्षामा बढी जोड दिन आग्रह गरेका छन् ।

आज काँकरभिट्टाको मेची सामुदायिक हलमा राष्ट्रिय प्रजातान्त्रिक विद्यार्थी संगठनको ऐतिहासिक झापा जिल्ला अधिवेशनको उद्घाटन गर्दै प्रमुख अतिथि समेत रहेका अध्यक्ष लिङ्देनले यस्तो बताएका हुन् ।

उनले विगतमा विद्यार्थीलाई राजनीतिमा लगाइयो तर, अब राजनीतिमा भन्दा शैक्षिक क्षेत्रको उन्नति र प्रगतिमा जोड दिनुपर्ने बताए ।
‘अहिले पनि अन्य राजनीतिक दलहरुले विद्यार्थीहरुलाई राजनीतिमा बढी र शिक्षामा कम लगाएका छन्’, लिङ्देनले भने–‘तर अहिले विद्यार्थीलाई राजनीतिमा भन्दा बढी शिक्षा क्षेत्रको विकासमा लगाउनु पर्छ ।’

देश विगार्ने ठुला पार्टीहरु

उनले ०४६ देखि २०८१ सालसम्मको ३५ वर्ष एमाले, कांग्रेस र माओवादीले देश विगारेको आरोप लगाए । देश संकटमा, चुनाव नभएको अवस्था र कर्मचारीले देश चलाइरहेको बेला पूर्व राजा ज्ञानेन्द्र शाहाले बाध्यताले १८ महिना सत्ता हातमा लिएको उनको भनाई छ ।

पूर्व राजालाई अभिभावक बनाएर राख्नु पर्छ

‘पूर्व राजा शाहाले १८ महिनापछि जनताको नासो जनतालाई सुम्पेका थिए’, लिङ्देनले भने–‘राजालाई अभिभावकको रुपमा राख्नुपर्छ ।’

प्रदेश खारेज गर्नु पर्छ

अध्यक्ष लिङ्देनले संघीयता खारेज नगरे ७ वटा प्रदेशको खर्च जनताले धान्न नसक्ने बताए । उनका अनुसार प्रदेशहरु खारेज गर्नुपर्छ । ७ वर्षअघि प्रदेश सञ्चालन गर्दा ६ अर्वको ऋण बढेर अहिले २५ खर्व पुगेको छ । एउटा जनताको टाउकोमा अहिले करिव ८२ हजार ऋण रहेको छ । त्यसैले प्रदेशलाई पार्टीको नेता तथा कार्यकर्ता भर्ति केन्द्र नबनाउन उनको जोड छ ।

लिङ्देनले संघीयता चाहिँदैन भने पनि आफ्नै पार्टीका नेताहरु कोशी प्रदेशका सभामुख र सांसदहरु छन् । कार्यक्रममा कोशी प्रदेशका सभामुख अमबरबहादुर विष्ट पनि सहभागी भएका थिए ।

ढिलो हुनसक्छ तर जनताले हामीलाई खोजिरहेका छन्

कार्यक्रममा पार्टीका कोशी प्रदेश अध्यक्ष एवम् दमक नगरपालिकाका मेयर राम थापाले विद्यार्थी भनेका देशका सम्वाहक, शक्ति र योद्वा भएको बताए ।

उनका अनुसार बंगलादेशमा १५ वर्ष सम्म शासन गर्ने शक्तिलाई ३ जना विद्यार्थीको दुईहप्ते आन्दोलनले देश छाड्न बाध्य बनाएको छ । ढिलो हुनसक्छ तर जनताले हामीलाई खोजिरहेको उनको दावी छ ।

कार्यक्रममा राष्ट्रिय प्रजातान्त्रिक विद्यार्थी संगठनका अध्यक्ष कमल वन, पार्टीका केन्द्रीय सदस्य नरेन्द्रकुमार खड्का, राष्ट्रिय प्रजातान्त्रिक युवक संगठन झापाका अध्यक्ष राजकुमार राई, विद्यार्थीहरु सोफिया खड्का, पंकज साह लगायतले शुभकामना मन्तव्य व्यक्त गरेका थिए ।

राष्ट्रिय प्रजातान्त्रिक विद्यार्थी संगठन झापाको नयाँ कार्यसमितिको नामहरु पार्टीका झापा अध्यक्ष केशव ओझाले सार्वजनिक गरेका थिए । नवनिर्वाचित अध्यक्ष सुनिल धिमालले प्रतिबद्वता मन्तव्य व्यक्त गरेका थिए ।

कार्यक्रममा मेचे समुदायको नित्य र झापाका सांस्कृतिक विभाग प्रमुख अच्युत दाहालले गीत प्रस्तुत गरेका थिए भने विद्यार्थी संगठनको हालै गाउँपालिका र नगरपालिकामा नवनिर्वाचित अध्यक्षहरुलाई सम्मान समेत गरिएको थियो ।

सोही अवसरमा केहि समाजसेवी महिलाहरु राप्रपामा प्रवेश गरेका छन् । उनीहरुलाई अध्यक्ष लिङ्देनले टिका लगाएर पार्टीमा स्वागत गरेका थिए ।

राष्ट्रिय प्रजातान्त्रिक विद्यार्थी संगठनका संयोजक चक्र फुयलले सांगठानिक प्रतिवेदन प्रस्तुतसहित अध्यक्षता गरेको कार्यक्रमको स्वागत उपाध्यक्ष सुनिल धिमालले र सञ्चालन सचिव मुन्ना आलमले गरेका थिए ।

भिडियो पनि हेर्नु होला ।