वन उपभोक्ता महासंघको सभामा ९ जना सम्मानित

मेचीनगर, २५ कात्तिक । सामुदायिक वन उपभोक्ता महासंघ मेचीनगरले प्रथम परिषद् सभामा ९ जना व्यक्तित्वहरुलाई सम्मान गरेको छ ।

आज मेचीनगर–११ र १२ को कालिका सामुदायिक वन उपभोक्ता समुहको सिमसार क्षेत्रमा महासंघ मेचीनगरको प्रथम परिषद् सभामा रेञ्ज पोष्ट महासंघका ६ जना पूर्व अध्यक्षहरु, ३ वटा संस्थाका अध्यक्षहरुलाई सम्मान गरिएको हो ।

सम्मानित हुनेहरुमा मागुरमाडी रेञ्ज पोष्ट महासंघका पूर्व अध्यक्षहरु वेदप्रकाश भण्डारी, पुष्पा भण्डारी, रोहितकुमार ढुंगाना, छविलाल गौतम, निर्मल दाहाल र देबेन्द्र दाहाल छन् ।

त्यस्तै मेचीनगरका १३ वटा सामुदायिक वनहरु मध्ये उत्कृष्ट कालिका सामुदायिक वन उपभोक्ता समुहका अध्यक्ष योगराज भट्टराईलाई सम्मान गरिएको छ ।

यसैगरी मेची उद्योग बाणिज्य संघका अध्यक्ष खेमराज प्रसाई र उज्यालो नेपाल बर्दियाका प्रमुख रमेशकुमार थापालाई सम्मान गरिएको छ । सम्मानित थापा भने कार्यक्रममा उपस्थिति हुन सकेनन् ।

सम्मानित व्यक्तित्वहरुलाई मेचीनगर नगरपालिकाका मेयर गोपाल चन्द्र बुढाथोकीले प्रशंसा पत्रद्वारा सम्मान गरेका थिए ।

कार्यक्रमका प्रमुख अतिथि मेयर बुढाथोकीले मेचीनगर कोशी प्रदेशमा नै पर्यटनको सम्भावना बोकेको महत्पूर्ण क्षेत्र भएको बताए । उनले मेचीनगरका १३ वटा सामुदायिक वनहरुलाई पर्यटनको रुपमा विकास गर्न सकिने प्रचुर सम्भावना रहेको दावी गरे ।

‘पर्यटनको प्रबर्धन गर्न नगरपालिकासँग बजेट छ’, मेयर बुढाथोकीले भने–‘नगरका सबै सामुदायिक वनहरुसँग साझेदारीमा पर्यावरण र पर्यटनको प्रबर्धनमा काम गर्न सकिन्छ ।’

कार्यक्रममा सामुदायिक वन उपभोक्ता महासंघका झापा अध्यक्ष वेदप्रकाश भण्डारी, मेचीनगर–११ का वडाध्यक्ष रुद्र डाँगी, ९ नम्बर वडाका वडाध्यक्ष कञ्चनकुमार तामाङ, मेची उद्योग बाणिज्य संघ अध्यक्ष खेमराज प्रसाई, मागुरमाडी रेञ्ज पोष्ट महासंघका पूर्व अध्यक्ष निर्मल दाहाल, थोप्लेविरान सामुदायिक वन उपभोक्ता समुहका अध्यक्ष कृष्ण कोइराला, रेपिड रेस्पोन्स टिमका (आरआरटी) संयोजक होमनाथ पौडेल लगायतले शुभकामना मन्तव्य व्यक्त गरेका थिए ।

कार्यक्रममा आर्थिक प्रतिवेदन लेखा समिति संयोजक रमेश भट्टराईले प्रस्तुत गरेका थिए ।

सामुदायिक वन उपभोक्ता महासंघ मेचीनगरकी अध्यक्ष जानुका ओलीले बार्षिक प्रतिवेदन प्रस्तुतसहित कार्यक्रमको अध्यक्षता गरेकी थिइन् ।

कार्यक्रमको स्वागत उपाध्यक्ष यामकान्त प्याकुरेलले र सञ्चालन महासचिव खेमराज राई चाम्लिङले गरेका थिए ।