मेचीनगरमा अपाङ्ग संघ गठन, अध्यक्षमा घिमिरे

मेचीनगर, १८ मंसिर । मेचीनगर स्तरीय अपाङ्ग संघ गठन गरिएको छ ।

आज ३३ औँ अन्तर्राष्ट्रिय अपाङ्गता दिवसको अवसरमा मेचीनगर–७ का समाजसेवी धर्मराज घिमिरेको अध्यक्षतामा २१ सदस्यीय मेचीनगर अपाङ्ग संघ गठन गरिएको हो ।

कोशी प्रदेशको सामाजिक विकास मन्त्रालय, मेचीनगर नगरपालिका र करुणा फाउण्डेशन नेपालको त्रिपक्षीय लागत साझेदारी तथा राष्ट्रिय अपाङ्ग महासंघको प्राविधिक सहयोगमा सञ्चालित अपाङ्गता रोकथाम तथा पुनःस्थापना कार्यक्रम अन्तरगत उक्त संघ गठन गरिएको छ ।

समितिको उपाध्यक्षद्वयमा गंगाप्रसाद संग्रौला र राम बुढाथोकी, सचिवमा अनिश काफ्ले, सहसचिवमा रविन्द्रकुमार न्यौपाने र कोषाध्यक्षमा निलादेवि भट्टराईलाई चयन गरिएको छ ।

त्यस्तै सदस्यहरुमा हेमलाल सापकोटा, युवराज वस्नेत, अम्बिका पोखरेल, सृजना कट्टेल, सरिता तामाङ, कोषराज प्रसाई, दुर्गाबहादुर खड्का, विश्वविजय घिमिरे, पुष्पा खड्का, गोपाल तामाङ, विष्णुकुमार श्रेष्ठ, सोमनाथ न्यौपाने, रिता नेपाल, अश्विनीकुमार काफ्ले र सञ्जना राई रहेका छन् ।

‘समावेशी तथा दिगो भविष्यको पूर्वाधार, अपाङ्गता भएका व्यक्तिहरूको प्रवल नेतृत्व यसको आधार’ मुल नाराका साथ मंगलबार अपाङ्गता दिवसको अवसरमा खेलकुद प्रतियोगिता आयोजना गरिएको थियो । प्रतियोगितामा विभिन्न विद्यामा उत्कृष्ट हुने सहभागीलाई पुरस्कारको व्यवस्था गरिएको थियो ।

प्रतियोगितामा हन्डी फुटाउने, बिस्कुट दौड, चम्चा दौड, सियो दौड लगायतका अतिरिक्त क्रियाकलाप समेत आयोजना गरिएको थियो ।

प्रतियोगिताका प्रथम, द्वितिय, तृतिय र सान्त्वना हुनेहरुलाई पुरस्कार स्वरुप नगद ५ हजार, ४ हजार, ३ हजार र २ हजार रुपैयाँ प्रदान गरिएको नगरकी महिला विकास अधिकृत जयन्ती खरेलले बताइन् ।

बिस्कुट दौड प्रतियोगितामा सोमनाथ न्यौपाने प्रथम, अम्बिका पोखरेल दोस्रो, सुरज तामाङ तेस्रो र विमल खत्रीे सान्त्वना भए । सियो दौड प्रतियोगितामा रुपा किसान प्रथम, आशिका पोखरेल दोस्रो, दुर्गा खड्का तेस्रो र रिम्पा राजवंशी सान्त्वना भए ।

त्यस्तै चम्चा दौड प्रतियोगितामा खगेन्द्र राजवंशी प्रथम, युवराज बस्नेत दोस्रो, हरिमाया कार्की तेस्रो र पवित्रा तामाङ सान्त्वना भएका थिए ।

यसैगरी हन्डी फुटाउने खेलमा कसैले पनि फुटाउन नसकेपछि हन्डीको नजिक पुग्ने तीन जनालाई प्रथम पुरस्कार पाँच हजारलाई बराबरी भाग गरेर वितरण गरिएको थियो ।

कला प्रस्तुतितर्फ निला भट्टराई मुक्तक, पवित्रा तामाङ गायन, मीना गिरी कविता, सुरज तामाङ जीवनी, मन्जिल तामाङ धान नृत्य र विकास कार्कीले नृत्य प्रस्तुत गरेर पुरस्कार हात पारेका थिए । कार्यक्रममा नगरको पन्ध्र वटै वडाका अपाङ्गता भएका व्यक्तिहरुको सहभागिता रहेको थियो ।

मेचीनगर नगरपालिका उपमेयर मीना पोखरेल उप्रेतीले आत्मसम्मानपूर्वक जीवनयापन गर्न, सार्वजनिक सेवा तथा सुविधामा समान पहुँचको हक सुनिश्चित गरेको बताइन् ।

प्रमुख प्रशासकीय अधिकृत अग्निप्रसाद अधिकारीले अपाङ्गताको आधारमा गरिने विभेदलाई निषेध गर्दै अन्य नागरिक सरह सामाजिक, आर्थिक र राजनीतिक क्षेत्रमा अर्थपूर्ण सहभागिता गराउने संविधानको मर्मलार्य सबैले बुझ्न जरुरी रहेको बताए ।

वरिष्ठ प्रशासकीय अधिकृत अनन्तप्रकाश वस्तीले अझैपनि अपाङ्गता भएका व्यक्तिहरूप्रति समाजमा नकारात्मक भावनाहरू फैलिरहेको बताए ।

कार्यक्रममा समाज सेवा सुधार युवा संघ अपाङ्ग सहयोग समितिका अध्यक्ष समेत रहेका धर्मराज घिमिरेले नगरपालिका अझ उदार भएर लाग्ने कुरामा आशावादी रहेको बताए ।