घाँस–दाउरा लिन गएकी महिलालाई हात्तीले आक्रमण गर्दा मृत्यु

बनियानी, १७ पुस । नजिकैको जंगलमा घाँस र दाउरा काट्न गएका समूहकी मध्ये एकजना महिलालाई हात्तीले लखेटेर आक्रमण गर्दा मृत्यु भएको छ ।

कचनकबल गाउँपालिका–७ स्थित दिपज्योति सामुदायिक वनमा घाँस र दाउरा काट्न गएका १५÷२० जनाको समूह मध्येकी अन्दाजी ३५ वर्षीया केलाबत्ती राजवंशीलाई आज मध्यान्न १२ वजे जंगली हात्तीले लखेटेर मारेको जिल्ला प्रहरी कार्यालय झापाले जनाएको छ ।

राजवंशीलाई हात्तीले लखेटेर खेदाएको बनियानी प्रहरीमा जानकारी हुनासाथ खोजी गर्दा दिउँसो साढे ४ वजे वनमा घाइते अवस्थामा फेला परेको प्रहरीको भनाई छ ।

वनदेखि बनियानीको ९ किलोमिटर पश्चिम उत्तरमा राजबंशीलाई घाइते अवस्थामा भेटिएको इलाका प्रहरी कार्यालय बनियानीको टोलीले जनाएको छ ।

घाइते राजबंशीलाई उपचारका लागि ओमसाई पाथिभरा हस्पिटल भद्रपुर पठाइएको थियो । त्यहाँ पनि उपचार सम्भव नभएपछि प्रादेशिक अस्पताल भद्रपुर लगिएको थियो ।

राजबंशीको प्रादेशिक अस्पतालमा उपचारको क्रममा साँझ ५ वजे चिकित्सकले मृत घोषणा गरेको प्रहरीले बताएको छ ।