।। अर्जुन कार्की ।।
बाहुनडाँगी, १० फागुन । विगतमा खोलाको पानी खाइरहेका मेचीनगरका तीन वटा वडाका उपभोक्ताले पछिल्लो समय मासिक एकसय रुपैयाँमा बीस हजार लिटर पानी प्रयोग गर्न पाएका छन् ।
बाहुनडाँगी सिद्विखोला एकिकृत खानेपानी उपभोक्ता तथा सरसफाइ संस्था सञ्चालनमा आएपछि मेचीनगर–१, २ र ४ नम्बर वडाका उपभोक्ताले मासिक एकसय रुपैयाँमा बीस हजार लिटर पानी पिउन र प्रयोग गर्न पाएका हुन् ।
२०६९ सालदेखि निरन्तर ३ कार्यकाल समालिरहेका संस्था अध्यक्ष सनत अधिकारीले हाल करिव १३०० उपभोक्ताहरुले यो सेवा लिइरहेको बताएका छन् । समयमा तिर्ने उपभोक्तालाई छुटको व्यवस्था र सामूदायिक विद्यालयहरुलाई ५० प्रतिशत छुटको व्यवस्था गरिएको उनले जानकारी दिए ।
संस्थालाई पछिल्लो समयमा १८ करोड ४३ लाख ६३ हजार ९३६ रुपैयाँको आयोजना आएपछि भौतिक पूर्वाधारहरु थपिएका छन् । वडा नम्बर १, २ र ४ का विभिन्न स्थानमा संस्थाले खानेपानीका ढल, बोरिङ, ट्याङ्की, कम्पाउण्ड वाल, भवन, पानीको प्रशोधन लगायतका कामहरु सम्पन्न गरिसकेको छ ।
यही फागुन महिनाभित्र नयाँ बनिएका बोरिङहरुबाट थप उपभोक्ताहरुलाई पानीको सुविधा दिने गरी तयारी गरिएको छ । संस्थाको १५ लाख लिटर क्षमता रहेको पानीको ट्याङ्कीबाट करिव ३५ सय उपभोक्तालाई सेवा प्रदान गरिने अध्यक्ष अधिकारीले बताए ।
वडा नम्बर १ को रामजानकी मन्दिर छेउ निन्दा सिरानमा नयाँ एउटा डिप बोरिङ, देवीगञ्जमा नयाँ एउटा डिप बोरिङ, वडा नम्बर ४ आल्डाँगीको भोर्लेनीमा नयाँ एउटा डिपबोरिङ र वडा नम्बर २ को काँडेमा श्यामपोयलसहित पानी प्रशोधन केन्द्र स्थापना भएको छ ।
उक्त भवन र डिप बोरिङहरु निर्माण गर्न स्थानीयले जग्गादान गरेका छन् । वडा नम्बर ४ को आल्डाँगीको २ कठ्ठा जग्गा स्थानीय स्व.श्याम र तारा सुवेदीबाट, वडा नम्बर २ को काँडेको २ कठ्ठा ३ धुर जग्गा राधिका तामाङबाट, वडा नम्बर १ को भट्टराई चोकको १ कठ्ठा १२ धुर जग्गा कोमलप्रसाद भट्टराईबाट, वडा नम्बर १ कै देविगञ्जको १ कठ्ठा १० धुर जग्गा खिवलाल भट्टराईबाट, वडा नम्बर १ कै निन्दाको १२ धुर जग्गा पूर्णिमा कट्टेलबाट, वडा नम्बर २ को रामजानकी मन्दिर छेउको ६ धुर जग्गा खेमराज ढकालबाट र सोही ठाउँको ५ धुर जग्गा सुरेश घिमिरेबाट अनुदान प्राप्त भएको अध्यक्ष अधिकारीले जानकारी दिए ।
संस्थाको हाल पुरानो र नयाँ खरिद गरिएको जग्गा १ विघा १२ कठ्ठा १८ धुर रहेको छ । यसअघि संस्थालाई मेचीनगर नगरपालिका, तत्कालिन जिल्ला विकास समिति, गाविस, खानेपानी तथा सरसफाइ डिभिजन कार्यालय, संघिय खानेपानी विराटनगर लगायतले बजेट विनियोजन गरेको थियो ।
संस्थाको स्थापनाकालमा संस्थापक अध्यक्ष भगिरथ घिमिरेले वडा नम्बर १ को मुख्य मुहानको जरुवा पानीबाट पानी प्रशोधन गरेर पहिलो पटक ४८० वटा धारा उपभोक्तालाई वितरण गरेर सुरु गरेका थिए ।
उनको ५ वर्षे कार्यकाल सकिएपछि २ कार्यकाल हिम्मत क्षेत्रीले समालेका थिए । त्यसपछि संस्थाको ३ वर्षे कार्यकाल बनाएपछि ०६९ सालदेखि हालसम्म अध्यक्षमा अधिकारी नै छन् ।
संस्थाको यही फागुन १७ गते अधिवेशन हुँदैछ । अधिवेशनपछि अध्यक्ष अधिकारीको कार्यकाल सकिदैछ । अध्यक्ष अधिकारीले आयोजना सुरु हुनुअघि यहाँका जनताले खोलाको पानी पिउने गरेको बताए । पानी प्रशोधन नहुँदा सुरुमा उपभोक्ताले धमिलो पानी समेत पिउन बाध्य भएको उनले तितो अनुभव सुनाए ।
शनिबार संस्थाले मेचीनगरका सञ्चारकर्मीहरुलाई आयोजना भएका स्थानहरुमा स्थलगत अवलोकन भ्रमण गराएका छन् ।
भिडियो पनि हेर्नु होला ।
Discussion about this post