महोत्सवमा भाषा, संस्कृतिको प्रर्वद्धन गर्दै आदिवासी जनजाति

मेचीनगर, २८ चैत । काँकरभिट्टा खेल मैदानमा जारी तेस्रो आदिवासी जनजाति सांस्कृतिक महोत्सवको दोस्रो दिन धिमाल, थामी र माझी समुदायले आफ्नो भाषा, परम्परा र संस्कृतिलाई प्रर्वद्धन गरेका छन् ।

बुधबारदेखि नेपाल आदिवासी जनजाति महासंघ समन्वय परिषद् मेचीनगरले आगामी बैशाख २ गतेसम्म आयोजना गरेको आदिवासी जनजाति सांस्कृतिक महोत्सवको दोस्रो दिन आज धिमाल, थामी र माझी समुदायले आफ्नो भाषा र संस्कृतिलाई संरक्षण गर्ने प्रयास गरेका छन् ।

धिमाल जाति विकास केन्द्रका चित्र धिमाल, नेपाल थामी संघका ललित थामी र नेपाल माझी उत्थानका सन्तलाल माझीको अगुवाइमा भएको सांस्कृतिक कार्यक्रममा लोप हुन लागेको भाषा, कला, संस्कृति, परिकार, परम्परालाई जोगाइ राख्न एकजुट भएर लागिरहेको सन्देश दिएका छन् ।

धिमाल, थामी र माझी समुदायको हक, हित र सुरक्षाका लागि सधै लडिरहेका विज्ञ तथा अगुवाहरुले आफ्नो जातिको पहिचानका लागि निडर भएर लाग्न सबै आ–आफ्नो ठाउँबाट भूमिका खेल्नु पर्ने राय राखेका थिए ।

त्यस्तै चैत २९ गते नेपाल तामाङ घेदुङ, सुनुवार समाज र राजबंशी समाज विकास समितिका नेतृत्वकर्ता भक्त तामाङ, पदम सुनुवार र र दिनेश राजबंशीको सहकार्यमा हुनेछ ।

चैत ३० गते नेपाल मगर संघ, नेपाल शेर्पा संघ, बिर्जा समाज समिति र मुण्डा समुदायका नेतृत्वकर्ता विकास थापा मगर, पासङ शेर्पा, अभिशेक बिर्जा र वन्दन मुण्डाको सहकार्यमा हुनेछ ।

यस्तै चैत ३१ गते नेवा दे दवु, किराँत राई यायोक्खा र थारु कल्याणकारी सभामुदायका नेतृत्वकर्ता शोभा श्रेष्ठ, बालाजित राई र रञ्जित र चौधरीको सहकार्यमा हुनेछ ।

आगामी बैशाख १ गते भुजेल समाज, किराँत याक्थुग चुम्लुङ र मेचे शिवियारी आफतका नेतृत्वकर्ता लक्ष्मिकान्त भुजेल, वीरु वेघा र देशभक्त मेचेको सहकार्यमा हुनेछ । र अन्तिम समापनका दिन बैशाख २ गते तमु हूयूल छोँजधी र किसान समुदाय क्लबका नेतृत्वकर्ता सुभास गुरुङ र भीम किसानको सहकार्यमा सांस्कृतिक कार्यक्रम हुने आयोजकले जनाएको छ ।

हिजो महोत्सवको उद्घाटन प्रमुख अतिथि प्रतिनिधि सभाकी उपसभामुख इन्दिरा राना मगरले गरेकी थिइन् । प्रमुख अतिथि उपसभामुख राना, हिन्दु, बौद्व, किराँत, मुस्लिम र क्रिश्चयनका धर्मगुरुहरुले परेवा उडाएर शान्ति र सदभाव अनि एकताको सन्देश दिएका थिए ।

महोत्सवमा आउने आगन्तुकहरुलाई सबै समुदायहरुले स्टल राखेर आ–आफ्नो जातिको खानाका परिकार, भाषा, कला, संस्कार र पहिचानका विषयमा जानकारी दिइरहेका छन् ।

नेपाल आदिवासी जनजाति महासंघ समन्वय परिषद् मेचीनगरका अध्यक्ष रामबहादुर वाइवाको अध्यक्षतामा भएको उद्घाटन कार्यक्रमको सहजीकरण महोत्सव संयोजक केवलराम राईले गरेका थिए ।