आसाममा पक्राउ परेका प्रसाईलाई झापा हुँदै काठमाडौँ लगियो

मेचीनगर, २९ चैत । भारतको आसाममा पक्राउ परेका मेडिकल व्यवसायी दुर्गा प्रसाईलाई आज मेचीनगरबाट प्रहरीले नियन्त्रणमा लिएर काठमाडौं लगिएको छ ।

उनलाई बुद्ध एअरको जहाजमार्फत आज काठमाडौं पठाइएको हो । उनलाई लिन विमानस्थलमा नेपाल प्रहरीका तीन वटा गाडी भित्रै गएका थिए । त्यसमध्ये डीएसपीको गाडीले सञ्चारकर्मीको आँखा छलेर वैकल्पिक बाटोबाट उनलाई बाहिर निकालेको छ ।

उनलाई प्रहरी परिसर काठमाडौं पु¥याइएको छ । तीनकुनेमा अराजकता मच्चाउने समूहका अगुवा प्रसाईंमाथि अनुसन्धानका लागि आजै म्याद थप गर्ने तयारी भएको छ ।

प्रहरीले अहिले कागजात मिलाइरहेको छ । उनलाई आजै म्याद थपका जिल्ला अदालत काठमाडौं लग्नेछ ।

प्रहरीको विशेष टोलीले काँकरभिट्टा नाकाबाट प्रसाईंलाई नेपाल भित्र्याएको हो । भारतबाट नेपाल ल्याइएका प्रसाईंलाई केहिबेर जिल्ला प्रहरी कार्यालय झापामा राखिएको थियो ।

भारतीय क्षेत्रबाट झापा ल्याउन्जेल उनलाई नेपाल प्रहरी र सशस्त्र प्रहरीले स्कर्टिङ गरेका थिए । साथै काँकरभिट्टा नाकामा सुरक्षाकर्मीहरुको तैनाथी बढाइएको थियो । उनका आफन्त र केही समर्थकहरु पनि त्यहाँ भेला भएका थिए ।

भारतको आसाम राज्यमा विहीबार पक्राउ परेका प्रसाईंलाई ल्याउन नेपाल प्रहरीको विशेष ब्यूरो, काठमाडौं उपत्यका अपराध अनुसन्धान कार्यालयको टोली भारत पुगेको थियो ।

राजसंस्था पुनस्र्थापनाका लागि भन्दै संयुक्त जनआन्दोलन परिचालन समितिले तीनकुनेमा चैत १५ गते गरेको प्रदर्शनको मुख्य कमाण्डर प्रसाईं थिए । सो प्रदर्शनले हिंसात्मक रुप लिँदा दुई जनाको मृत्यु भएको थियो भने निजी तथा सार्वजनिक सम्पत्तिमा तोडफोड र आगजनी भएको थियो ।

त्यसपछि प्रहरीलाई नै गाडीले पेलेर अघि बढेका प्रसाईं एकएक गायव भएका थिए । त्यसयता प्रहरीले उनको खोजी गरिरहेको थियो । यसबीचमा प्रसाईंले सामाजिक सञ्जालबाट भिडियो पोस्ट गर्दै आफू फरार नरहेको बताउँदै आएका थिए ।

प्रहरीले विभिन्न नाकामा टोली परिचालन गरेर खोजी गरिरहेका बेला उनी आफ्ना सहयोगीसहित भक्तपुर, सिन्धुली हुँदै बिर्तामोडस्थित बीएण्डसी मेडिकल कलेजमा पुगेको खुलेको थियो । त्यहाँबाट भागेर उनी भारत पसेका थिए ।