इलाम, ६ साउन । एचकेआर इन्टरटेन्मेन्टको व्यानरमा निर्माण गरिएको हाँस्य टेलिफिल्म ‘जिन्दगी लफडै लफडा’ आज साँझ सार्वजनिक हुँदैछ ।
समाजका विविध आयामहरु समेटेर तयार पारिएको टेलिफिल्मले हाँस्य व्याङ्गसहितको सामाजिक सन्देश दिन खोजेको निर्माण पक्षले दावी छ ।
इलाम सूर्योदय नगरपालिका–१ को ऐतिहासिक सीमावर्ती बजार मंगलबारेमा छायांकन गरिएको टेलिफिल्ममा गाउँघरको मौलिक भाषा, संस्कृति, बोलीचाली, जीवनशैली लगायतलाई नजिकबाट चित्रण गर्न खोजिएको छ ।
हिमाल, पहाड, तराई, छिमेकी भारत र विदेशमा बसोबास गर्ने नेपालीको कथासमेत समेटेर समग्र नेपाली समाजको जीवनशैली उजागर गर्ने प्रयास गरिएको निर्माण पक्षको भनाइ छ ।
टेलिफिल्मका निर्देशक तथा कथाकार हिकस राईले यसमा हाँस्य र भावनात्मक दुवै पक्ष समेटिएको बताए । उनका अनुसार दर्शकले एकछिन हाँसोका खित्का पाउनेछन् भने अर्कोतिर आँसुका थोपा पनि सँगसँगै पाउनेछन् ।
टेलिफिल्ममा इलामे युवा पत्रकार बिक्रम सुन्दासले मोहनलाल पात्रको भूमिका निर्वाह गरेका छन् । त्यस्तै, मोडल मुकेश गुरुङले चुलबुले, साहिल कार्कीले भैरे, विपना लेप्चाले आमा, हेम गेशाले देशी कान्छा, निकिता राईले चाँचरी, कुलमित लेप्चाले ठुली, प्रमोद शुब्बाले सालो, सुचन सम्पाङ राईले छोरा र निर्देशक हिकस राईले विदेशी पात्रको भूमिकामा अभिनय गरेका छन् ।
दर्शकले माया र साथ दिनेमा टिम विश्वस्त रहेको पत्रकार सुन्दासले बताए । टेलिफिल्म ‘जिन्दगी लफडै लफडा’ एचकेआर इन्टरटेन्मेन्टको आधिकारिक युट्युब च्यानलमार्फत सार्वजनिक गरिनेछ ।
Discussion about this post