मेचीनगर, २९ साउन । झनकप्रसाद–खीनमाया कट्टेल समाज कल्याण प्रतिष्ठानले आदर्श मावि ईटाभट्टालाई अत्याधुनिक दस थान कम्प्युटर सेट हस्तान्तरण गरेको छ ।
विहीबार विद्यालय परिसरमा एक कार्यक्रमको आयोजना गरेर प्रतिष्ठानले उक्त कम्प्युटर हस्तान्तरण गरेको हो ।
हस्तान्तरण गरिएको कम्प्युटर ल्यावको मेचीनगर नगरपालिकाका नगरप्रमुख गोपालचन्द्र बुढाथोकीले उद्घाटन गरेका थिए ।
कार्यक्रमका प्रमुख अतिथि नगरप्रमुख बुढाथोकीले संघीय सरकारले शिक्षा नीति संशोधन नगरेका कारण स्थानीय तहमा बजेटको अभावै अभाव रहेको बताए । उनका अनुसार स्थानीय सरकारले पिच नबनाउने हो भने शिक्षामा धेरै बजेट लगानी गर्न सकिने छ ।
उनले भने ‘दाताले विद्यार्थीहरुको उज्जवल भविश्यका लागि दिएको सुविधायुक्त कम्प्युटर प्रयोगविहिन भएर दुरुपयोगको अवस्थामा नपुगोस् । सदुपयोग होस् भन्ने कामना गर्दछु ।’
प्रतिष्ठानका अध्यक्ष एवम् विद्यालयका पूर्व विद्यार्थी डम्बरु वल्लभ कट्टेलले आगामी दुई वर्षभित्र २० वटा कम्प्युटर दिने गरी यसवर्ष १० वटा कम्प्युटर हस्तान्तरण गरेका हुन् । अत्याधुनिक सुविधायुक्त एउटा कम्युटरको करिव एकलाख रुपैयाँ पर्ने बताइएको छ ।
पूर्व विद्यार्थी कट्टेलले यसअघि बुबा झनकप्रसाद कट्टेलको नाममा एक लाखको अक्षयकोष पनि खडा गरिदिएका छन् । स्व.झनकप्रसादले नकलबन्दा स्थित मेची डिलमा रहेको यस विद्यालयलाई ईटाभट्टा ल्याउन ठुलो योगदान रहेको थियो ।
२०२५ सालमा स्थापना भएको विद्यालयमा हाल ११ सय विद्यार्थी पढ्दै छन् । कम्प्युर ल्यावमा यो दश वटा कम्प्युटर २५ वटा पुगेको छ । कक्षा–१ देखि १२ सम्म अध्यायन गर्ने विद्यार्थीहरुलाई प्राविधिक शिक्षामा सहज हुँदै गएको छ ।
प्रतिष्ठानका अध्यक्ष कट्टेलका अनुसार आफु पढेका बेला यस्तो कम्युटर देख्न पाइएन, अब का विद्यार्थीहरुले अहिलेको टेक्नोलोजीलाई नपछए धरै छैन । त्यसैले उच्च शिक्षा हासिल गर्न प्राविधिक रुपमा विद्यार्थीलाई मद्दत पुग्ने छ । यही स्कुलको पूर्व विद्यार्थी समेत भएकाले मैले भविश्यमा विद्यालयलाई सक्ने सहयोग गरिरहने उनको भनाई छ ।
उनले भर्खरै बुबा स्व.झनकप्रसाद कट्टेलको ‘झनक बाजे–एक भुईमान्छे’ स्मृतिग्रन्थ प्रकाशित गरेर सार्वजनिक समेत गरिसकेका छन् ।
कार्यक्रममा स्व.झनकप्रसाद कट्टेलकी पत्नी खीनमाया कट्टेल लगायत कट्टेल परिवार, वडा नम्बर ८ का वडाध्यक्ष गिरीराज धमला, वडा सदस्यहरु, प्रतिष्ठानका पदाधिकारीहरु, शिक्षक, विद्यार्थी, कर्मचारी लगायतको उपस्थिति रहेको थियो ।
आदर्श माविका व्यवस्थापन समिति अध्यक्ष पूर्णबहादुर खड्काको अध्यक्षतामा सम्पन्न कार्यक्रमको स्वागत प्रधानाध्यापक कृष्ण पुरीले र सञ्चालन सहायक प्रधानाध्यापक लम्बोदर पौडेलले गरेका थिए ।
Discussion about this post