झापा, २२ भदौ । पतञ्जली योग झापाले शिवसताक्षी नगरपालिकामा सहायक योग प्रशिक्षक तालिम सुरु गरेको छ ।
शिवसताक्षी–८ का वडाध्यक्ष सन्तकुमार फेउदिनले शिविरको उद्घाटन गरे । उद्घाटन समारोहमा वडा नम्बर–७ का वडाध्यक्ष भवानी विक्रम चेम्जोङको पनि सहभागी थियो । उनी पनि योग कक्षाका प्रशिक्षार्थी हुन् ।
१५ दिनसम्म सञ्चालन हुने उक्त तालिमबाट शिवसताक्षी–६, ७ र ८ का करिब ८० जना प्रशिक्षार्थीहरूले सहायक योग प्रशिक्षक हुने अवसर पाउने पतञ्जली योग झापाले जनाएको छ ।
प्रशिक्षार्थीका लागि झिलझिले माध्यमिक विद्यालयको सभा हल र वडा नम्बर–६ तथा ७ का लागि लालझोडाको भानु माध्यमिक विद्यालयको प्राङ्गणमा तालिम सञ्चालन हुने स्थानीय समन्वय समितिका संयोजक समेत रहेका पतञ्जली योग समिति शिवसताक्षीका मोहन निरौलाले जानकारी दिए ।
कार्यक्रमका प्रमुख अतिथि वडाध्यक्ष फेउदिन र वडाध्यक्ष चेम्जोङ्गले तालिम सफलताको शुभकामना व्यक्त गर्दै पतञ्जली योग शिवसताक्षीको स्थानीय वडा समितिलाई चालु आर्थिक वर्षबाट बजेट विनियोजन गरि आर्थिक सहयोग गर्ने बताए ।
कार्यक्रममा छिमेकी बचत तथा ऋण सहकारी संस्थाका उपाध्यक्ष उदयप्रकाश राई, नेपाली कांग्रेसका नेता परशुराम ढुंगाना, पतञ्जली योग झापाका अध्यक्ष देवीप्रसाद घिमिरे, महिला कमिटी झापाकी अध्यक्ष प्रेमकला निरौला, संगठन विभाग प्रमुख तथा सचिव कृष्णप्रसाद ओझा लगायतले योगका महत्वबारे चर्चा गरेका थिए ।
योगले शरिर, मन र आत्माको सन्तुलन मिलाउने प्राचीन जीवनशैली हो । शिविरमा शारीरिक व्यायाम, श्वासप्रश्वास नियन्त्रण, ध्यान र अनुशासनको अभ्यास भइरहेको छ ।
झापामा करिव १० हजारभन्दा बढीले नियमित रूपमा योग गर्दै आएको पतञ्जली योग झापाले जनाएको छ । कार्यक्रमको सहजीकरण पतञ्जली योग झापाका महासचिव रुद्र ओलीले गरेका थिए ।
Discussion about this post