‘झापा गोल्डकप’ माघ २४ गतेदेखि

बिर्तामोड, १६ माघ । यही माघ २४ गतेदेखि झापा गोल्डकप हुने भएको छ ।

बिर्तामोड स्थित डोमालाल राजवंशी रंगशालामा यही माघ २४ गतेदेखि आगामी फागुन ४ गतेसम्म हुने भएको हो ।

‘एक्स्ट्रिम सातौँ झापा गोल्डकप विनोद बस्नेत स्मृति संस्करण अन्तर्राष्ट्रिय आमन्त्रण नकआउट फुटबल प्रतियोगिता’का रूपमा आयोजना गरिने झापा गोल्डकपका अध्यक्ष केदार गिरीले शुक्रबार बिर्तामोडमा पत्रकार सम्मेलनमा जानकारी गराएका हुन् ।

प्रतियोगिताको मुख्य प्रायोजकका रूपमा एग्रो थाई फुड्स प्रालिको उत्पादन ‘एक्स्ट्रिम इनर्जी ड्रिंक्स’ रहने छ ।
प्रतियोगिताका विजेताले नगद १५ लाख र उपविजेताले ७ लाख ५० हजार रुपैयाँ पुरस्कार पाउने छन् ।

त्यस्तै उत्कृष्ट खेलाडी (मस्ट भ्यालुएबल प्लेयर) लाई मोटरसाइकल, सर्वाधिक गोलकर्ता, उत्कृष्ट गोलकिपर र उत्कृष्ट प्रशिक्षकले जनही ३५ हजार रुपैयाँ पुरस्कार पाउने छन् ।

प्रत्येक खेलको ‘प्लेयर अफ द म्याच’ लाई २१ हजार रुपैयाँ प्रदान गरिने आयोजकले जनाएको छ । विधागत पुरस्कारको प्रायोजन अमेरिका निवासी रोशनलाल श्रेष्ठ सहितको टोलीले गरेको छ ।

प्रतियोगितामा विभागीय टोली त्रिभुवन आर्मी क्लब, नेपाल पुलिस क्लब, एपीएफ क्लब, महिन्द्र क्लब, लालीगुराँस क्लब पोखरासहित घरेलु तथा विदेशी गरी १० वटा टोलीको सहभागिता रहनेछ । प्रतियोगितामा भुटानको रोयल थिम्पु कलेज, भारतको सिग्लिज स्पोर्टिङ क्लब र मलेसियाको एन पेनाङ एफसीले पनि प्रतिस्पर्धा गर्ने छन् ।

यस वर्ष झापाका एक जना पुराना फुटबल खेलाडीलाई नगद २५ हजारसहित सम्मान गरिने आयोजकले जनाएको छ । रंगशालाको जग्गादाता डोमालाल राजवंशीको परिवारलाई पनि नगद २५ हजार रुपैयाँ सहयोग प्रदान गरिने छ ।

प्रतियोगिता सञ्चालनका लागि करिब एक करोड ५० लाख रुपैयाँ खर्च अनुमान गरिएको छ भने त्यसबाट करिव ३० प्रतिशत बचाउँने झापा गोल्डकपका अध्यक्ष केदार गिरीले बताए ।

प्रतियोगिताको क्वाटर, सेमी र फाइनलको क्रमशः १००, २०० र ३०० रुपैयाँ टिकट रहेको छ । एक लाख दर्शक भित्राउने लक्ष्य छ । क्लबका २०३ जनाले सदस्यता नविकरण र १९० जनाले नयाँ सदस्यता लिएको बताइएको छ ।

प्रतियोगितालाई एग्रो थाई फुड्सको उत्पादन एक्सट्रिम एनर्जी ड्रिङ्कसले प्रायोजन गर्ने सहमति रहेको छ । शुक्रबारै एक्सट्रिम एनर्जी ड्रिङ्कस र आयोजकबिच सम्झौता पत्रमा हस्ताक्षर भएको छ ।

झापा गोल्डकपका वरिष्ठ उपाध्यक्ष गजेन्द्रवहादुर पौडेलले स्वागत गरेको कार्यक्रमको सञ्चालन सञ्चारकर्मी केशव भट्टराईले गरेका थिए ।