झापामा अर्थाेकाेन-२०२६

झापा, २८ माघ । नेपाल अर्थोपेडिक एशाेसिएशनको ३१औँ वार्षिक सम्मेलन तथा अर्थाेकाेन-२०२६ मा अन्तर्राष्ट्रिय विशेषज्ञहरु समेतको सहभागितामा झापामा गरिने भएको छ ।

यही फागुन १ गतेदेखि धुलाबारी स्थित होटल मेची क्राउनमा सम्मेलन आयोजना गरिने आज बिर्तामोडमा आयोजित पत्रकार सम्मेलनमा जानकारी दिइएको हो ।

सम्मेलनमा विदेशका १०० भन्दा बढी वरिष्ठ चिकित्सक तथा नेपालका प्रोफेसरहरु ५०० भन्दा बढी हाडजोर्नी विशेषज्ञ डाक्टरहरू गरी ६०० भन्दा बढीको सहभागिता रहने बताइएको छ ।

हाडजोर्नी विशेषज्ञ डा. लक्ष्मीप्रसाद मैनालीको अध्यक्षतामा सम्मेलन झापामा गराउन पाउनुले झापाबासी अत्यन्त उत्साहित, गौरवान्वित एवम् खुसी महसुस गरिरहेका छौं भन्दै महासचिव डा.रुपेशजंग बेलबासेले कार्यक्रम बारे अवगत गराए ।

उक्त सम्मेलनमा भारत, चीन, बंगालादेश, वेलायत, हङकङ, अष्ट्रेलिया लगायत देशहरुबाट विशेषज्ञ डाक्टरहरुको सहभागिता रहने डा. बेलबासेले बताए ।

माघ २९ गते भोलि बिर्तामोडका तीनवटा अस्पतालहरुमा ट्रेनी डाक्टरहरु एवम् विद्यार्थीहरुको सहभागितामा हाडजोर्नीका समस्याहरुका बारेमा विषयगत छलफल एवम् बिरामीहरुको परीक्षण गराइने आयोजक समितिका सहअध्यक्ष डा. निराजन पराजुलीले जानकारी दिए ।

प्रिकन्फरेन्स वर्कसपमा प्रिएक्जाम प्रक्टिस, एक्स रे, एमआरआई, सिटीस्क्यानका रिपोर्ट परीक्षणजस्ता विषयमा सहजीकरण गरिने डा. पराजुलीको भनाई छ ।

बिर्तामोडका बिएण्डसी, स्पाइन एक्स र बिर्तासिटी हस्पिटलमा उपचाररत बिरामीहरुको परीक्षण सहित हाडजोर्नीका विभिन्न समस्याहरु कसरी समाधान गरिँदैछ भन्ने विषयमा सहभागी देशभरका प्रशिक्षार्थी चिकित्सकहरुलाई प्रयोगात्मक पद्धतिबाट प्रशिक्षण गराइने डा.प्रेम शाहीले बताए ।

माघ २९ गते बिर्तामोडमा प्रीकन्फरेन्स वर्कसप सञ्चालन पछि फागुन १, २ र ३ गते होटल मेची क्राउन धुलाबारीमा अन्तर्राष्ट्रिय सेमिनारको मुख्य कार्यक्रम आयोजना गरिएको अध्यक्ष डा. मैनालीले बताए ।

यस कार्यक्रम आयोजना गर्नका लागि करिब १ करोड ५० लाख रुपैयाँ भन्दा बढी खर्च हुने अनुमान गरिएको तथा कोशी प्रदेश सरकारबाट पर्यटन प्रवर्धनका लागि ५ लाख रुपैयाँ प्राप्त हुने प्रतिबद्धता आएको छ पनि डा. मैनालीले बताए ।

कोशी प्रदेशको झापा जिल्लामा नै पहिलोपटक आयोजना गरिएको अर्थोकोन-२०२६ को सञ्चालनका लागि स्थानीय सङ्घ संस्था एवं व्यक्तिहरूले पनि साथ र सहयोग गर्ने प्रतिबद्धता जनाएको आयोजकको भनाई छ ।

नेपाल अर्थोपेडिक एसोसिएसन केन्द्रीय समितिका महासचिव नागमनि सिंहले ३१औं वार्षिक सभाको नारा एडुकेशन, कोलाबोरेशन र इन्नोभेशन रहेको अवगत गराउँदै नेपालमा नै बनाइएका विश्वस्तरको गुणस्तरीय प्रविधिलाई नेपालको प्रयोगमा ल्याउन मद्धत गर्ने लक्ष्य राखिएको छ ।