बाहुनडाँगीमा सहिद विश्वनाथको शालिक बन्दै

मेचीनगर, ११ भदौ । जीवन बलिदान गरेको साठी वर्षपछि झापाका प्रथम सहिद विश्वनाथ घिमिरेको शालिक मेचीनगरको बाहुनडाँगीमा बन्न सुरु भएको छ ।

नेपाली कांग्रेसका पूर्व महामन्त्री कृष्णप्रसाद सिटौला र पार्टीका प्रवक्ता विश्वप्रकाश शर्माले आज एक कार्यक्रमबीच शालिकको संयुक्त शिलान्यास गरेका छन् ।

नेपाली कांग्रेसका संस्थापक नेताहरु वीपी कोइरालालगायतका समकालीन नेता घिमिरेको २०१९ साल जेठ ३१ गते झापाको मेचीनगर–८ पुण्यचोकमा बाटोमा हिँडिरहेको बेला तत्कालीन पञ्चायती शासकले छद्मभेषमा पठाएको हतियारधारी सेनाले गोली हानी हत्या गरेका थिए ।

२०४६ सालको जनान्दोलनपछि कृष्णप्रसाद भट्टराई प्रधानमन्त्री भएको अवस्थामा सरकारले घिमिरेलाई राष्ट्रिय सहिद घोषणा गरेको थियो । सहादत प्राप्त भएको ६० वर्षमा मेचीनगर–४ बाहुनडाँगीमा उनको शालिक बनाउन लागिएको हो ।

सहिद घिमिरेको परिवारका तर्फबाट प्रदान गरिएको एक कठ्ठा तीन धुर जग्गामा उनको अर्धकदको शालिक निर्माण गर्न लागिएको सहिद विश्वनाथ घिमिरे स्मृति प्रतिष्ठानका अध्यक्ष तथा नेपाली कांग्रेस झापाका उपसभापति राम कट्टेलले बताए । उनले सहिद घिमिरेको शालिक आगामी कार्तिकभित्र अनावरण भइसक्ने बताए ।

शालिक शिलान्यास कार्यक्रममा बोल्दै नेपाली कांग्रेसका पूर्व महामन्त्री सिटौलाले राजा महेन्द्रले २०१७ सालमा प्रजातन्त्र अपहरण गरेर निरंकुश शासन सुरु गरेको दुई वर्ष नबित्दै जननिर्वाचित प्रधानमन्त्री वीपी कोइराला जेलमा भएको बेला सदरमुकाम चन्द्रगढी बोलाएर पञ्चायती शासकहरुले बाटैमा गोली हानी घिमिरेको हत्या गरेको बताए ।

नेपाली कांग्रेसका प्रवक्ता तथा केन्द्रीय सदस्य विश्वप्रकाश शर्माले ढिलै भए तापनि सहिद घिमिरेको योगदानको मूल्यांकन भएको बताए । उनले विगतको कम्युनिस्ट सरकारले जे जे गल्ती गरेको छ, वत्र्तमान सरकारले त्यस्तो गल्ती नदोहोर्याउने विश्वास व्यक्त गरे ।

शिलान्यास कार्यक्रममा पार्टीकी केन्द्रीय सदस्य सरिता प्रसाई, जिल्ला सभापति उद्धव थापा, मेचीनगर प्रमुख विमल आचार्य, सहिद घिमिरेका छोरा भगिरथ घिमिरे, पार्टीका क्षेत्रीय सभापति मणिकुमार उप्रेती लगायतले सहिद घिमिरेको योगदानको चर्चा गरेका थिए ।
कार्यक्रममा स्वागत भाषण युवा नेता नविन बरालले र सञ्चालन निरज घिमिरेले गरेका थिए ।