सांसद राधा थापाले यसरी खर्च गरिन् बजेट

मेचीनगर, २० साउन । प्रदेश नम्बर एककी सांसद राधा थापाले आफुले बजेटका लागि पेश गरेका धेरै योजनाहरु नपरेको बताएकी छन् ।
जनता समाजवादी पार्टीकी केन्द्रीय सदस्य एवम् अनुसासन समितिकी सदस्य समेत रहेकी सांसद थापाले आफुले थुप्रै योजनाहरु पेश गरे पनि बजेटमा नपरेको बताएकी हुन् ।
तत्कालिन खस पार्टीको कोटाबाट झापा क्षेत्र नम्बर १ की समानुपातिक सांसद बनेकी थापाले प्रदेश सरकारले जारी गरेको २०७८÷७९ को बजेट भाषण र रेडबुकमा आफुले पेश गरेका धेरै योजनाहरु नपरेको भन्दै आक्रोश पोखिन ।
उनले मुख्यमन्त्री र विभिन्न मन्त्रालयका मन्त्रीहरुले योजनाहरु ल्याउनुहोस् हामी बजेटमा पाछौँ भन्छन् तर कहिले समावेश नगरेको गुनासो गरिन् । उनले वर्षेनी झापा, मोरङ, सुनसरी लगायतका जिल्लाका विकास निर्माण र सिप तथा जनचेतना मुलक कार्यक्रमका योजनाहरु पेश गर्ने गरेकी छन् । तर, धेरै योजना नपरेकोमा उनी दुःखी भएकी छन् ।
‘झापा क्षेत्र नम्बर १ का लागि धेरै वटा योजना समावेश गरेर मन्त्रालयहरुमा बुझाए’, सांसद थापाले भनिन्–‘सम्बन्धीत वडा र नगरपालिकाबाट फलानो योजनाका लागि सिफारिस ले भन्छन् । आफुले सोहि अनुसार वडा र नगरालिकाबाट सिफारिस पनि लगे तर, रेडबुकमा धेरै योजनाहरु कहिलै पारेनन् ।’
मुख्यमन्त्री र मन्त्रीहरुले आफुलाई सधै ढाँट्ने मात्र गरेको उनको भनाइ छ । तर पनि उनले यो चार वर्षको अवधिमा केहि योजनाहरु पार्न सफल भएकी छन् । सांसद थापाले २०७५ सालमा मेचीनगर–४ स्थित बाहुनडाँगीमा हात्ती करिडोरका लागि २५ लाख, २०७६ सालमा मेचीनगर–३ स्थित निन्दा घाटको भवन निर्माणका लागि १० लाख र मेचीनगर–६ स्थित काँकरभिट्टामा भ्युटावर निर्माणका लागि २ करोड रुपैयाँ बजेटमा पार्न सफल भएकी छन् ।
मिनिमाउन्टेन स्तरोन्नतीका लागि १ करोड २५ लाख रकम आफुले ल्याएकोमा अन्य पार्टीका सांसदहरुले धाधली गरेर उक्त रकम अन्यत्र पठाईएको प्रदेशकी सुसासन समितिकी सदस्य समेत रहेकी सांसद थापाको दावी छ । त्यस्तै उनले प्रदेश निर्वाचन क्षेत्र विशेष कार्यक्रम मार्फत ५० लाख बजेट पाएकी थिइन् । उनले उक्त बजेट झापाको विभिन्न क्षेत्रमा खर्च गरेकी छन् ।
जस्मा मेचीनगर–२ को आइतबारे कल्भर्ट निर्माणका लागि १० लाख, मेचीनगर–६ को कालीखोला पारी सडक स्तरोन्नतीका लागि १० लाख, मेचीनगर–१३ को आदिवासी जनजाति सामुदायिक भवन निर्माणका लागि ५ लाख, बुद्वशान्ति गाउँपालिकामा ५ लाखको ह्युमपाइप वितरण, भद्रपुर–३ को किरात याक्थुङ चुम्लुङ नगर समितिको भवन निर्माणका लागि ५ लाख, मेचीनगर–२ को मेची जनसाधारण माविमा छात्रा शौचालय निर्माणका लागि ५ लाख, मेचीनगर–८ को संयुक्त युवा संघलाई सिलाइ–कटाइ तालिमका लागि १ लाख ५० हजार बजेट दिईएको सांसद थापाले बताइन् ।
त्यसैगरी साई केन्द्र मेचीनगर–६ लाई विभिन्न आवश्यक सामग्री खरिदका लागि १ लाख, मेचीनगर–६ को बाल जागरणलाई विद्यार्थी शैक्षिक सामग्री खरिदका लागि १ लाख, मेचीनगर–७ को काजी ग्रिन फाउण्डेशनका लागि च्याउ तालिम सञ्चालन गर्न १ लाख, मेचीनगर–८ को किरात याक्थुङ चुम्लुङ भवनमा कुर्सी खरिदका लागि १ लाख र मेचीनगर–३ को नव जागरण महिला तथा बालबालिका उत्थान संस्थालाई लागुऔषध दुव्र्यसन तथा घरेलु हिंसा न्युनिकरण कार्यक्रमका लागि १ लाख, नेपाल आदिवासी जनजाति महासंघ मेचीनगर समन्वय समितिलाई विभिन्न जातिहरुको भेषभुषा, गरगहना तथा सांस्कृतिक हतियार खरिदका लागि १ लाख बजेट वितरण गरिएको उनले बताइन् ।
यस्तै किरात याक्थुङ चुम्लुङ भद्रपुरलाई कार्यालयको फर्निचर खरिदका लागि १ लाख २५ हजार, उत्पीडित अधिकार मञ्च बिर्तामोडलाई दलित जनप्रतिनिधिहरुलाई अभिमुखिकरण तालिमका लागि ५० हजार र जिल्ला समन्वय समिति झापाको प्रशासनिक र प्रतिनिधि खर्च वापत ७५ हजार बजेट खर्च गरि सम्पन्न भईसकेको सांसद थापाले जानकारी दिइन् ।

।। अर्जुन कार्की ।।