झापा, २४ कात्तिक । शिवसताक्षी नगरपालिका–८ मा ५२ करोड निजी लगानीमा सञ्चालनमा ल्याइएको जिल्लाकै ठूलो वाटर किङडम पार्क एण्ड रिसोर्टमा नेपालकै चर्चित मंगोलियन हार्टका राजु लामाको सांगीतिक व्यान्डमार्फत कार्यक्रम हुने भएको छ ।
पार्कको व्यापक प्रचार प्रसार गर्ने उद्देश्यले आगामी मंसिर १० गते सो कार्यक्रम गरिने वाटर किङडम पार्क एण्ड रिसोर्टका सञ्चालक सौजनराज संग्रौलाले मंगलबार पत्रकार सम्मलेन गरी जानकारी गराएका हुन् ।
विर्तामोडदेखि पश्चिम १७ किलोमिटर र दमकपूर्व १४ किलोमिटरमा रहेको पूर्वपश्चिम राजमागको झिलझिले चोकदेखि ३०० मिटर दक्षिणमा रहेको पार्कमा प्रत्येक महिना विभिन्न सांगीतिक कार्यक्रम हुँदै आएको उनले बताए ।
ठूलो लगानी गरेर गतबर्ष मात्र सञ्चालनमा ल्याइएको पार्क कोभिड–१९ को महामारीका कारण लामो समय बन्द हुँदा ठूलो नोक्सानी व्यहोर्नुपरेको उनको भनाई छ । बन्दको समयमा छ करोड ५० लाख घाटा व्यहोरेको पार्कमा पछिल्लो समय आन्तरिक पर्यटकहरु आउन थालेका छन् ।
“सरकारले पर्यटन क्षेत्र खुल्ला गरेसँगै आन्तरिक पर्यटक आउन थालेका छन”, उनले भने “हाम्रो उद्देश्य भनेको बाह्य पर्यटकलाई पनि आकर्षण गर्ने हो । राजु लामा देशकै चर्चित सांगीतिक क्षेत्रका हस्ती हुन । हाम्रो पार्कको राष्ट्रिय तथा अन्तर्राष्ट्रियस्तरमा प्रचार हुने अपेक्षाले कार्यक्रम आयोजना गरेका हौ ।”
साँझ ६ बजेदेखि १० बजेसम्म हुने कार्यक्रम सञ्चालनका लागि ३० लाख अनुमाति खर्च हुने उनले जानकारी दिए । कार्यक्रममा मनोरञ्जन लिन आउने सहभागीहरुबाट एक हजारदेखि २५ हजारसम्मको टिकट विक्री गरिने योजना रहेको छ । सांगीतिक कार्यक्रमबाट मनोरञ्ज लिनका लागि करिब पाँच हजार पर्यटक भित्र्याउने अपेक्षा लिएको उनको भनाइ छ ।
पार्कमा पानीबाट मात्र खेलेर मनोरञ्जन लिन सकिने स्विमिङ पुल, वेब पुल, मल्टिलेण्ड स्लाइड, वेब स्लाइड, क्रुसर स्लाइड, सोफालेण्ड स्लाइड र पेन्डुलम स्लाइड छन् । पर्यटकलाई थप मनोरञ्जन प्रदान गर्ने उद्देश्यले जिप लाइन, सुपरम्यान जिपलाइन र जिप साइक्लिङ पनि व्यवस्था गरिएको सञ्चालक समिति सदस्य तथा पत्रकार विनोद सापकोटाले बताए ।
उनका अनुसार पार्कसँगै विवाह गर्ने, विभिन्न प्रकारका उत्सव मनाउने, पिकनिक खाने, तालिम, गोष्ठी, सेमिनार र विभिन्न सभा समारोह गर्नका लागि सुविधा सम्पन्न रिसोर्ट समेत सञ्चालनमा रहेको छ । यहाँले स्थानीय ७० जनाले प्रत्यक्ष रोजगारी पाइरहेका छन् ।
Discussion about this post