झापा, १२ मंसिर । नेपाली कांग्रेस झापाको उपसभापति पदमा बिजयको झण्डा फहराएका केशवराज पाण्डेले उम्मेद्वारहरुमध्ये सबैभन्दा लोकप्रिय (धेरै) मत पनि पाए ।
ज्यामिरगढीको गोमनसरी गाउँमा बाल्यकाल बिताएका केशवराज पाण्डे राजनीतिक चेत आएदेखि नै नेपाली कांग्रेसको राजनीतिमा सक्रिय छन् ।
किसानका छोरा उनले खेतीकिसानीको दुःखकष्ट पनि भोगेका छन् । साइकलमा सरर स्कुल धाउने उनी क्याम्पस पढ्न विर्तामोडको कनकाई क्याम्पस पुग्दा उनी नेपाल विद्यार्थी संघको नेता भइसकेका थिए ।
२०४६ र २०६२ सालको जनान्दोलनको भुक्तभोगी उनी कनकाई क्याम्पसमा नेविसंघको तर्फबाट स्वतन्त्र विद्यार्थी युनियनको सभापति समेत भए ।
छरितो ज्यान, हँसिलो मुहार र भाषण क्षमताका धनी उनी विद्यार्थीमाझ अति नै लोकप्रिय थिए ।
उनी क्याम्पसको राजनीति पछि गाउँ फर्किएर नेपाली कांग्रेसको राजनीतिमा सक्रिय भए । वडा तहबाटै कार्यकर्तासँग घुलमिल हुने स्वाभाव भएका कारण उनी उमेरले सानो भए तापनि अग्रजहरुले समेत स्वीकार्ने खालका नेता भए ।
त्यहीबेला उनले व्यावसायिक क्षेत्रमा हात बढाए । मेची भन्सार एजेन्ट संघको सदस्य बनेर भन्सार क्लियरिङ कारोवार समेत गरेका उनले इम्पोर्ट हुने सामानहरुको व्यापार समेत गरे ।
व्यावसायिक जगतमा पनि उनी अगुवा नै बने । मेची उद्योग वाणिज्य संघको कार्य समिति सदस्य, उपाध्यक्ष अध्यक्ष हुँदै उनी नेपाल उद्योग वाणिज्य महासंघको केन्द्रीय सदस्य पदमा पटक पटक पुगे ।
व्यवसायसँगै राजनीति अघि बढाएका उनले राजनीति गर्न कसैसँग चन्दा माग्नु परेन । आफ्नै धरातलमा टेकेर राजनीतिक सक्रियता बढाएका उनी नेपाली कांग्रेसको जिल्ला सदस्य, कोषाध्यक्ष हुँदै अहिले उपसभापति निर्वाचित भएका छन् ।
कांग्रेस वृत्तभित्र उनलाई पार्टीको भावी जिल्ला सभापतिको रुपमा हेर्ने गरिएको छ ।
संसदीय राजनीतिमा पद प्राप्त गर्न नसके तापनि उनी असफल भने छैनन् । किनकि, पार्टीले विश्वास गरेर उनलाई गत प्रदेश सांसद्को निर्वाचनमा उनलाई उम्मेद्वार बनाएको थियो ।
खासमा उनी मेचीनगर नगरपालिकाको मेयर पदमा उम्मेद्वार बन्न चाहन्थे । तर पार्टीले उनकै व्यावसायिक साझेदार एवम् राजनीतिक सहयोद्धा बिमल आचार्यलाई मेयरको उम्मेद्वार बनाउने सोच बनाए पछि उनले समर्थन जनाए ।
अहिले मेचीनगर–७ इटाभट्टामा उनी बस्छन् । राजनीति, व्यापार र सामाजिक सेवाको क्षेत्रमा उत्तिकै रुपमा हात बढाइरहेका उनको काँधमा अब नेपाली कांग्रेसको झापा जिल्ला संगठन बलियो बनाउने जिम्मेवारी आएको छ ।
जहाँ हात हाले पनि मिहेनत गर्ने स्वाभाव भएका उनलाई नजिकबाट बुझ्नेहरु भन्छन्–केशव असफल चाहिँ कहिल्यै जान्दैनन् ।
Discussion about this post