ओलीको गृहनगरमा नेपालको गर्जन : आउँदो चुनावमा एमाले पत्तासाफ हुन्छ

।। अर्जुन कार्की ।।

दमक, २० मंसिर । एकिकृत समाजवादी पार्टीका अध्यक्ष एवम् पूर्व प्रधानमन्त्री माधवकुमार नेपालले आउँदो चुनावमा नेकपा एमाले पत्तासाफ हुने भन्दै एमालेका अध्यक्ष केपी ओलीको गृहनगरमा गर्जिएका छन् ।

आज दमकमा नेपाल खेलकुद महासंघ समाजवादी १ नम्बर प्रदेश स्तरीय भेला तथा प्रशिक्षण कार्यक्रमलाई सम्बोधन गर्दै अध्यक्ष नेपालले गठबन्धनका पाँच दलहरु आउँदो चुनावमा एक भएर गएपछि एमाले पत्तासाफ हुने बताए ।

‘नाम कमाएपछि अहंकार बन्ने परम्परा छ,’ नेकपा समाजबादीका अध्यक्ष नेपालले भने–‘खेलाडीमा त्यस्तो नहोस् । राजनीतिकमा पनि त्यस्तो परम्परा छ । त्यसलाई चिर्न आवश्यक छ । त्यस्तो परम्परा अब नसिकाउनुहोस् । खेल एउटा महत्वपूर्ण पक्ष हो, यसले राष्ट्रिय तथा अन्तराष्ट्रिय रुपमा चिनाउँछ ।’

समाजबादी पार्टीले मदन भण्डारीको जनताको वहुदलीय जनवादलाई आत्मसाथ गर्दै समाजवादको बाटो लाग्ने उनको भनाइ थियो ।

वडादेखि केन्द्रसम्म पार्टी र संगठन निर्माणमा जुटेको बताउँदै अध्यक्ष नेपालले आगामी दिनमा जनताको घरघरमा पुगेर कलम चिन्हमा भोट माग्दै स्टीकर अभियान चलाउने बताए । संगठन निर्माणका लागि स्वैच्छिक चन्दा अर्थात स्टीकर अभियान चलाउने पार्टीको योजना रहेको उनले बताए ।

कार्यक्रममा प्रदेश १ का मुख्यमन्त्री राजेन्द्र राईले नेपालमा ठुलाठुला क्रान्ति भयो, परिवर्तन भए तर जनताले भने अझै दुःख मात्र पाइरहेको बताए । गरीवका लागि क्रान्ति नआएको उनले ठोकुवा गरे । उनले जनताले दुःख मात्र पाए, कहिलै सुख पाएनन्, त्यसकारण के का लागि क्रान्ति भन्दै प्रश्न गरे ।

कार्यक्रममा पार्टीका प्रदेश अध्यक्ष घनेन्द्र वस्नेत, नेपाल खेलकुद महासंघ समाजवादीका केन्द्रिय अध्यक्ष केशवकुमार विष्ट लगायतले शुभकामना मन्तव्य व्यक्त गरेका थिए ।

नेपाल खेलकुद महासंघ समाजवादी १ नम्बर प्रदेशका अध्यक्ष शंकर थापाको सभापतित्वमा भएको कार्यक्रमको स्वागत महासंघका प्रदेश इन्चार्ज हंशराज वाग्ले र सञ्चालन पार्टीका दमक नगर अध्यक्ष महेश घिमिरेले गरेका थिए ।