भद्रपुर, ८ फागुन । झापाका पत्रकार यादव पौडेल हत्यामा जन्मकैद सजाय तोकिएका मुख्य अभियुक्त युवराज गिरीले आममाफी पाएका छन् ।
प्रजातन्त्र दिवसको अवसरमा मन्त्रिपरिषद् बैठकको सिफारिसमा राष्ट्रपति विद्यादेवी भण्डारीले कर्तव्य ज्यान सम्बन्धी कसूरमा कैद भुक्तान गरिरहेका गिरीलाई शनिबार आममाफी दिईएको हो ।
मन्त्रिपरिषद्को सिफारिसमा राष्ट्रपति भण्डारीले गिरीसहित ५०१ जनाको भुक्तान हुन बाँकी कैद माफी मिनाहा गरिकी हुन् ।
गिरीसहित जिल्ला कारागार झापामा कैद सजाय भुक्तान गरिरहेका १६ जनाको बाँकी कैद माफी मिनाहा गर्ने निर्णय भएको झापाका प्रमुख जिल्ला अधिकारी छविलाल रिजालले बताए ।
मोरङ सिजुवा घर भएका पत्रकार पौडेलको ०६८ चैत २१ गते बिर्तामोड स्थित बसपार्कमा हत्या भएको थियो ।
पुनरावेदन अदालत इलामले ०७१ असार २५ गते पत्रकार पौडेलको हत्यामा संलग्न गिरीसहित ३ जनालाई जन्मकैदको फैसला सुनाएको थियो ।
अदालतको आदेशपछि फूलमाया भनिने मञ्जु ढकाल (कार्की) थुनामा गएकी थिइन् भने सोमनाथ ढकाल फरार भएका थिए । अर्का आरोपी मदन राईलाई ६ महिनाको कैद सजाय सुनाइएको थियो ।
Discussion about this post