मेचीनगर, ७ साउन । एकीकृत पाठ्यक्रम सम्बन्धी दुई दिने कार्याशाला गोष्ठी सम्पन्न भएको छ ।
एन प्याब्सन मेचीनगरको आयोजना तथा सिटिएफ नेपालको प्राविधिक सहयोगमा राष्ट्रिय पाठ्याक्रम प्रारुप २०७६ को कार्यान्वयनमा शिक्षकको पेशागत विकासका लागि गोष्ठीे आयोजना गरिएको थियो ।
काँकरभिट्टा स्थित खानेपानी कार्यालयको सभाहलमा २ दिनसम्म सञ्चालित कार्याशालाबाट नयाँ एकीकृत पाठ्याक्रमको बारेमा विविध जानकारी गराइनुका साथै पाठ योजना सम्बन्धी सहजीकरण गरिएको थियो । कार्यक्रममा विषय विज्ञद्वय दिनेश थापा र निर्मला पौडेलले सहजीकरण गरेका थिए ।
मेचीनगरका ९ वटा विद्यालयका ७१ जना शिक्षक–शिक्षिका सहभागी कार्यक्रममा समूह विभाजन गरेर तयार पारिएको प्रतिवेदन समेत प्रस्तुत गरिएको थियो ।
गोष्ठीकोे समापनका प्रमुख अतिथि मेचीनगर नगरपालिकाका शिक्षा शाखा प्रमुख एवम् उपसचिव होमनाथ भण्डारीले सहभागीहरुलाई एकीकृत पाठ्याक्रमको बारेमा जानकारी गराउनुका साथै स्थानीय पाठ्याक्रमको बारेमा अभिमुखीकरण गरेका थिए ।
कार्यक्रममा सम्पूर्ण सहभागीहरुलाई प्रमुख अतिथि भण्डारीले प्रमाणपत्र वितरण गरेका थिए ।
कार्यक्रममा सूर्योदय आवासीय माविका प्रधानाध्यापक शिव मैनाली, अरुणोदय आवासीय माविका प्रधानाध्यापक दुर्गाबहादुर लुईटेल, आदर्श विद्या मन्दिरका प्रधानाध्यापक एवम् एनप्याब्सन मेचीनगरका सचिव कविन्द्र श्रेष्ठ, माँ सरस्वती एजुकेशन फाउण्डेशनका प्रधानाध्यापक दिपेन्द्र प्रधान, सीताराम सामुदायिक माविका सहप्रधानाध्यापक नवराज सुवेदी, एनप्याब्सन मेचीनगरका पूर्व परीक्षा संयोजक तुलसीप्रसाद आचार्यको आतिथ्यता रहेको थियो ।
एनप्याब्सन मेचीनगरका अध्यक्ष भगिरथ राईको सभापतित्वमा सम्पन्न कार्यक्रमको सञ्चालन एनप्याब्सन झापाका सदस्य एवम् अंशु एकाडेमीका प्रधानाध्यापक किरण अधिकारीले गरेका थिए ।
Discussion about this post