महाबाणिज्य दुतलाई गुन्द्रीमै राखेर वडाध्यक्षले बुझाए ज्ञापनपत्र

बाहुनडाँगी, ९ साउन । कोलकताका महाबाणिज्य दुत ईश्वरराज पौडेलले मेचीनगर–४ स्थित बाहुनडाँगीको दुईदिने अवलोकन भ्रमण गरेका छन् ।

नेपाली महाबाणिज्य दुतावासको कार्यालय पश्चिम बंगालका कोलकताका महाबाणिज्य दुत पौडेलले शनिबार र आइतबार भारतसँग सीमा जोडिएको बाहुनडाँगी बजार, सीमा नाका, लागुऔषध, हात्ती र व्यापारका विषयमा अवलोकन गरेका हुन् ।

मेचीनगर–४ का वडाध्यक्ष अर्जुनकुमार कार्कीले महाबाणिज्य दुत पौडेललाई हात्ती, लागुऔषध लगायतका समस्या तथा यहाँ उत्पादन भएका वस्तुको वजारीकरणका विषयमा ज्ञापनपत्र बुझाएका थिए ।

ज्ञापनपत्र भारतसँग सीमा जोडिएको बाहुनडाँगीमा लागुऔषधको ओसारप्रसार र कारोबार, चेलीबेटी बेचविखन, खोला उत्खनन्, यसक्षेत्रबाट हुने असामाजिक अमानविय र गैर कानूनी कारोबारलाई भारतीय प्रशासनले इमानदार पूर्वक निगरानी र कडा कारवाही गर्न सके नियन्त्रण तथा न्युनिकरण हुन सक्ने उल्लेख छ ।

यसबाहेक साविक बाहुनडाँगी क्षेत्रमाजंगली हात्तीको समस्याका कारण धनजन र हात्ती स्वयमलाई पुग्ने को क्षतिको न्युनिकरण गर्न भारतीय उच्च अधिकारीहरुसँग छलफल गरी समाधानको उपाय खोज्न पहल गरिदिन, कोरोनाका कारण स्थगित भएको सीमा वैठक सुचारु गर्न पत्रमा आग्रह गरिएको छ ।

त्यस्तै यो क्षेत्र चिया, सुपारी, तेजपत्ता, मरिच, गाई पालनमा स्थापित भएपनि यसको बजारीकरण मुख्य भारत नै भएको हुँदा उचित मुल्यमा ती वस्तुहरु बिक्री वितरणको पहल गरिदिन महामहिमसँग स्थानीयबासीले माग गरेका छन् ।

बाहुनडाँगीको मुख्य समस्या हात्ती भएकोले गर्दा हात्तीबाट घाइते भएका, अन्य रोग विरामले अपठेरोमा परेका मेचीनगर–४ का बासिन्दाका लागि एउटा सुविधा सम्पन्न एमबुलेन्स उपलब्ध गराउन पहल गरिदिनु हुन महाबाणिज्य दुत पौडेललाई ज्ञापनपत्रमा आग्रह गरिएको छ ।

बाहुनडाँगीको सीमा नाका मेची खोलाको पारीपटि ताराबारीसम्म स्थानीयलाई सहज अवतजावत गर्न झोलुङ्गे पुल निर्माणका लागि पहल गर्न महाबाणिज्य दुत पौडेललाई माग गरिएको वडाध्यक्ष कार्कीले बताए ।
शनिबार दिउसो बाहुनडाँगी पुगेका पौडेललाई वडाध्यक्ष कार्कीले स्थानीय भावना गुरुङको मेची सामुदायिक होमस्टेमा बास बसाएका थिए । आइतबार वडा कार्यालयभित्र स्थानीयसँगै महामहिमलाई गुन्द्रीमा बसाएर छलफल गरेका थिए ।