बिर्तामोड, ९ साउन । स्थानीय तहमा निर्वाचित महिला जनप्रतिनिधिहरुलाई झापामा नेतृत्व विकासका लागि धमाधम तालिम दिन थालिएको छ ।
सोमबार बिर्तामोड स्थित होटल डेनियलमा दलित महिला केन्द्र नेपालको आयोजनामा बिर्तामोड नगरपालिकाका महिला जनप्रतिनिधिहरुलाई तीनदिने ‘सी लिड्स’ अभिमुखीकरण तालिम दिइएको हो ।
सुईस र अस्ट्रिेलियन सरकारको आर्थिक तथा ईन्टरनेशनल फाउण्डेशन फर इलेक्ट्रोनल सिस्टमको प्राविधिक सहयोगमा सोे अभिमुखीकरण तालिम दिन सुरु गरिएको छ ।
वडामा निर्वाचित दलित र खुल्ला वडा महिला सदस्यको काम, कर्तव्य र अधिकारका विषयमा जानकारी गराउने र महिलहरुलाई नेतृत्व विकास गराउने उद्देश्यले सो अभिमुखिकरण तालिम दिइएको केन्द्रका मुख्य प्रशिक्षक सोमराज ढकालले जानकारी दिए ।
तालिममा २३ जना महिला जनप्रतिनिधिहरुको सहभागिता रहेको छ । तालिममा मुख्य प्रशिक्षक ढकाल र अर्का प्रशिक्षक नविना सापकोटाले प्रशिक्षण दिईरहेका छन् ।
कार्यक्रममा प्रमुख अतिथि बिर्तामोड नगरपालिकाकी प्रमुख पवित्रा महतारा प्रसाई, उपप्रमुख नगेन्द्रप्रसाद संग्रौला, वडा नम्बर ४ का वडाध्यक्ष राहुल शर्मा, ५ नम्बर वडाका वडाध्यक्ष रोहित प्रसाई लगायतले शुभकामना मन्तव्य राखेका थिए ।
उपप्रमुख संग्रौलाको अध्यक्षतामा उद्घाटन सत्र सम्पन्न भएको थियो । कार्यक्रमको सञ्चालन मुख्य प्रशिक्षक ढकालले गरेका थिए । सो तालिम मंगलबार समापन हुने आयोजकले जनाएको छ ।
सो ‘सि लिड्स’ अभिमुखीकरण तालिम जिल्लाका ८ वटा पालिकामा धमाधम भईरहेको छ । यसअघि २०७४ सालमा झापाको ६ वटा पालिकामा निर्वाचित महिला जनप्रतिनिधिहरुलाई सो तालिम दिईएको कार्यक्रमकी संयोजक सम्झना पोखरेलले बताइन् ।
Discussion about this post