मेचीनगर, ८ साउन । उपभोक्ता महिला कृषि सहकारी संस्था लिमिटेड मेचीनगर–९ ले सदस्य लक्षित बृहत सहयोग तथा सम्मान कार्यक्रम सम्पन्न गरेको छ ।
आइतबार मागुरमाडी सिमसार क्षेत्रमा आयोजित कार्यक्रममा बाख्राको पाठा, ब्याग, हजारी, स्प्रे ट्यांकी वितरण गर्नुका साथै गुडिया तालिमका सहभागीलाई प्रमाणपत्र एवम् जनप्रतिनिधिलाई सम्मान एकसाथ सम्पन्न गरिएको हो ।
सहकारी संस्थाले २५ जना सदस्यलाई बाख्राको पाठा वितरण गरेको छ । विपन्न वर्गका सदस्यलाई लक्षित गरी बाख्राको पाठा वितरण गरिएको हो । यस्तै, ३५ जनालाई सिँचाइ हजारी, १० वटा स्प्रे ट्यांकी, १० जना विद्यार्थीलाई ब्याग तथा गुडिया र तालिममा सहभागी २९ प्रशिक्षार्थीलाई प्रमाण पत्र वितरण गरिएको थियो ।
संस्थाले महिलालाई आत्मनिर्भर बनाउन गुडिया तालिम सञ्चालन गरेको थियो । सहकारी संस्थाले भ्रमण खर्च वापतको कार्यक्रम हटाएर सदस्यलाई राहत वितरण गरेको संस्थाकी अध्यक्ष संगीता थापाले जानकारी दिइन् । संस्थाकी अध्यक्ष थापाले बैठक भत्ता वापतको रकम पनि नलिई सदस्य हितमा लगानी गरेको उनले बताइन् ।
सोही अवसरमा संस्थाले मेचीनगर नगरपालिका प्रमुख गोपालचन्द्र बुढाथोकी, उपप्रमुख मीना पोखरेल उप्रेती, मेचीनगर वडा नं ९ का वडाध्यक्ष कञ्चन तामाङ, वडा सदस्य धनकुमार श्रेष्ठलाई सम्मान गरेको थियो ।
संस्थाकी अध्यक्ष संगीता थापाको अध्यक्षता तथा प्रमुख अतिथी नगरप्रमुख बुढाथोकीले महिलाहरुले सञ्चालन गरेको सहकारीले सामाजिक उत्तरदायित्व वहन गरेको बताए । उनले हरेक नागरिक उत्पादनमूलक क्षेत्रमा जोडिन आवश्यक रहेको बताए ।
उनलेले प्लाष्टिकमुक्त नगर बनाउने आफूहरुको योजना रहेको सुनाए । उनले त्यसको विकल्पमा यहीँ उत्पादित झोला बिक्री वितरण गरेर प्लाष्टिक विस्थापन गरिने बताए ।
कार्यक्रममा मागुरमाडी सामुदायिक वन उपभोक्ता समूह विट नं १ का अध्यक्ष अमर लिम्बू लगायतले शुभकामना मन्तव्य राखेका थिए । सहकारी संस्थाकी उपाध्यक्ष प्रतीक्षा पराजुलीले स्वागत गरेको कार्यक्रमको सञ्चालन सचिव चन्द्रकला खवासले गरेकी थिइन् ।
Discussion about this post