हात्तीको समस्या समाधानका लागि सर्वदलीय छलफल

बाहुनडाँगी, २४ वैशाख । हात्तीको समस्या समाधानका लागि बाहुनडाँगीमा वडा कार्यालयले आयोजना गरेको सर्वदलीय छलफलले सुरक्षाकर्मी, वन रक्षक र आरआरटीलाई थप मजवुत बनाएर अघि बढ्ने निर्णय गरेको छ ।

विहीबार मेचीनगर–४ बाहुनडाँगी स्थित वडा कार्यालयमा वडाध्यक्ष अर्जुनकुमार कार्कीको अध्यक्षतामा बसेको सर्वदलीय छलफलले यस्तो निर्णय गरेको हो ।

मौसमी सोलार फेन्सिङ (तारबार) मर्मत गरेर लगाउने, नेपाल प्रहरी, सशस्त्र प्रहरी र रेपिड रेस्पोन्स टिमलाई थप सशक्त बनाएर लाने, बाटो निर्माण गर्ने, ट्याक्टर सञ्चालन गर्ने, माइकिङ गर्ने र राति ६ वजेपछि सरोकारवाला व्यक्तिहरुबाहेक कसैलाई खोला बगरमा देखे चेकजाँच र निगरानी गरिने निर्णय गरिएको वडाध्यक्ष कार्कीले जानकारी दिए ।

सर्वदलीय छलफलमा रास्वपाका विवेक तामाङ, नेकपा एमालेका तीर्थराज नेपाल, राप्रपाका नेताहरु रमेश दाहाल, इन्द्र प्रधान, नेकपाका खगेन्द्र रामदामु, डिभिजन वन कार्यालयका प्रतिनिधि यज्ञ बराल, प्रहरी चौकीका इन्चार्ज सई दिपिन थापा, सशस्त्र प्रहरीका युवराज निरौला, मानव हात्ती द्वोन्द व्यवस्थापन समितिका अध्यक्ष हरिप्रसाद उप्रेती, पूर्व अध्यक्ष सागर कार्की, नेपाल आदिवासी जनजाति महासंघका राजकुमार थेवे, वडा सदस्य नुरबहादुर कार्की लगायतले हात्तीको दीगो समाधान लागि सबै प्रक्रियाहरु अपनाएर साझा सहमतिमा अघि बढ्नु पर्नेमा जोड दिएका थिए ।

वर्षौदेखि हात्तीबाट पीडित किसानहरुको अन्नबालीमा क्षति, हात्तीको आक्रमणबाट अंगभंग, घाइते र ज्यानै समेत लिएको छ । हात्तीबाट पीडित किसानहरुले तीन तहकै सरकारबाट केहि राहत लिए पनि यसको दीगो समाधानको उपाय भने अहिलेसम्म भएको छैन् ।
छलफलको सहजीकरण वडाध्यक्ष कार्कीले गरेका थिए ।