मेरो देवी–देउता ती नै छन्, अरु कहाँबाट उठ्नु र : लिङ्देन

बिर्तामोड, १८ साउन । राप्रपाका अध्यक्ष राजेन्द्र लिङ्देनले आगामी मंसिरमा हुने प्रतिनिधि सभाको निर्वाचनमा झापा क्षेत्र नम्बर ३ बाट चुनाव लड्ने बताएका छन् ।

बुधबार बिर्तामोड स्थित होटल डेनियलमा झापाका पत्रकारहरुसँग राप्रपा अध्यक्ष लिङ्देनले त्यस्तो कुरा बताएका हुन् ।

उनले सुरुमा नै म तपाईहरुलाई केहि भन्दिन तर आज तपाईहरुको सुझाव लिने बताए । आगामी मंसिरमा हुने प्रतिनिधि सभा र प्रदेश सभा निर्वाचन र राप्रपा पार्टीका विषयमा सुझाव लिन मात्र यो चिया गफमा तपाईहरुलाई आमन्त्रण गरिएको उनको भनाई थियो ।

‘आज तपाईहरुले क्यामेरा निकाल्नु पर्दैन’, अध्यक्ष लिङ्देनले भने–‘फोटो पनि नखिच्नु होला । कलम डायरी पनि निकाल्नु पर्दैन । बास तपाईहरुको सुझाव मात्र भए पुग्छ ।’

अध्यक्ष लिङ्देनले पत्रकारका सुझावहरु ग्रहण गरेकाका थिए । झापा क्षेत्र नम्बर ३ बाटै उठ्ने होला नी भन्ने पत्रकारको जिज्ञासामा उनले भने –‘मेरो देवी–देउता ती नै छन् । अरु कहाँबाट उठ्नु र । अन्य क्षेत्रमा गइयो भने खतम हुइन्छ ।’

आगामी चुनावमा राप्रपा कुनै पनि दलसँग गठबन्धन गरेरै जान सक्ने अध्यक्ष लिङ्देनको भनाई छ ।