मेचीनगर, २८ असोज । धुलाबारी स्थित इष्ट होराइजन माविले दुवईमा शिक्षा अवार्ड पाएको छ ।
दुबईमा भएको एक विशेष कार्यक्रममा मासिक पत्रिका कलेज रिडर्सले इष्ट होराइजनलाई ‘इमर्जिङ स्कुल अफ द एअर’ अवार्ड प्रदान गरेको प्रिन्सिपल सञ्जिव राईले बताए ।
कलेज रिडर्सले नेपालको गुणस्तरीय शिक्षालय, विद्यालय, महाविद्यालय तथा शिक्षा उद्यमी एवम् शिक्षाविदहरुको अतुलनीय योगदानको पहिचान र कदरको सम्मान गर्दै आएको छ ।
शैक्षिक गुणस्तरका साथै खेलकुद, संगीत, नृत्य, हाजिरीजवाफ लगायत अतिरिक्त क्रियाकलापमा अब्बल रहेको होराइजनलाई त्यसैका आधारमा अवार्ड प्रदान गरेको राईको भनाई छ ।
कलेज रिडर्स अंग्रेजी माध्यमबाट प्रकाशित हुन्छ । विगत १५ वर्षदेखि निरन्तर नेपाली शैक्षिक, प्राज्ञिक क्षेत्रमा दरिलो सहभागिता जनाउँदै आएको छ ।
सो कार्यक्रममा ३४ वटा शिर्षकमा नेपालका उत्कृष्ट शिक्षालाय, विद्यालय, महाविद्यालयहरुलाई सम्मान गरिएको थियो । त्यस्तै, १६ शिर्षकमा शिक्षाविद, शिक्षासेवी तथा शिक्षा उद्यमीलाई सम्मानसहित पुरस्कृत गरिएको थियो ।
यसअघि होराइजनले ब्रिटिस काउन्सिलद्वारा सञ्चालित अन्तर्राष्ट्रिय विद्यालय पुरस्कार आइएसए कार्यक्रम अन्र्तगत अन्तर्राष्ट्रिय विद्यालय पुरस्कार जितेको थियो ।
Discussion about this post