झापा, १८ पुस । भर्खरै प्रहरीको कमाण्ड समाल्न झापा आएका एसपी दुर्गाराज रेग्मीले लागुऔषध लगायत अपराधजन्य गतिविधि नियन्त्रण गर्न निर्मम भएर लाग्ने बताएका छन् ।
सोमबार चन्द्रगढी स्थित जिल्ला प्रहरी कार्यालयको सभाहलमा आयोजित पत्रकार भेटघाट कार्यक्रममा उनले यस्तो कुरा बताएका हुन् ।
उनले लागुऔषध, आत्महत्या, मानव बेचविखन, चोरी तस्करी लगायतका अपराधजन्य गतिविधिमा कमी ल्याउने प्रतिवद्वता व्यक्त गरेका थिए ।
‘सानै भएपनि राम्रो काम गर्छु’, प्रहरी उपरीक्षक रेग्मीले भने–‘जतिदिन बस्छु क्राइम कन्ट्रोल, लागुऔषध, मानव वेचविखन र तस्करी नियन्त्रणमा निर्मम भएर लाग्छु ।’
झापामा बढ्दो आत्महत्या लगायतका घटनालाई कमी ल्याउन काठमाडौँबाट विज्ञ मनोपरामर्ष दाता झिकाएर अभियान नै चलाउने उनको भनाई छ ।
उनले स्थानीय निकाय, विभिन्न सामाजिक संघ–संस्थासँगको सहकार्यमा चेतनामुलक कार्यहरु अघिबढाउने र त्यसका लागि सबैको साथ, सहयोगको अपेक्षासमेत रहेको बताए ।
पत्रकार भेटघाट कार्यक्रमको सञ्चालन जिल्ला प्रहरी कार्यालयका प्रवक्ता डीएसपी बसन्त पाठकले गरेका थिए । कार्यक्रममा झापाका सञ्चारकर्मीहरुको बाक्लो उपस्थिति रहेको थियो ।
Discussion about this post