मेचीनगर, २४ माघ । मेचीनगरमा प्रथम वडाध्यक्ष कप फुटबल प्रतियोगिता हुने भएको छ ।
आज मेचीनगर–९ को वडा कार्यालयमा खेलकुद विकास समितिले पत्रकार सम्मेलन गरेर प्रथम वडाध्यक्ष कप फुटबल प्रतियोगिता हुने जानकारी गराएको हो ।
९ नम्बर वडा कार्यालय अन्तरगतको खेलकुद विकास समितिका संयोजक एवम् वडा सदस्य राजेन खड्काले यहि माघ २७ गतेदेखि फागुन ७ गतेसम्म प्रथम वडाध्यक्ष कप फुटबल प्रतियोगिता आयोजना गर्ने भएको बताए ।
वडाको ९ वटा टोलका युवा खेलाडीहरुको सहभागिता रहनेछ । प्रतियोगितामा वडाका राष्ट्रिय तथा अन्तराष्ट्रिय खेलाडीले मात्र सहभागिता जनाउन पाउने आयोजकले जनाएको छ ।
प्रतियोगिताका विजेतालाई नगद ४० हजार र उपविजेतालाई २५ हजार राशिसहित मेडल तथा प्रमाणपत्र प्रदान गरिने समितिका सचिव राजु धिमालले बताए ।
प्रायोजकका रुपमा मेचीनगरका सहकारी, सामुदायिक वन, जेसिज लगायतका सामाजिक संघ–संस्थाहरु रहनेछन् ।
प्रथम वडाध्यक्ष कप फुटबल प्रतियोगिताका लागि समितिलाई एक लाख ५० हजारको वजेट छुट्टाइएको पत्रकार सम्मेलनका प्रमुख अतिथि समेत रहेका वडाध्यक्ष कञ्चनकुमार तामाङले बताए । उनले वडाका युवाहरुलाई खेलकुदप्रति आकर्षित गर्न पनि यो प्रतियोगिता आयोजना गर्न लागिएको बताए ।
प्रतियोगिता सम्पन्न गर्न करिव दुई लाख ३० हजार रुपैयाँ खर्च लाग्ने अनुमान गरिएको समितिका सचिव धिमालले बताए ।
Discussion about this post